اسلام آباد (م ڊ) اسلام آباد کي هن وقت ڪنٽينر سٽي چيو پيو وڃي، رستا بند هجڻ سبب زندگي جو ڪاروهنوار متاثر ۽ ڪاروبار کي به نقصان ٿي رهيو آهي. پي ٽي آءِ جو احتجاج روڪڻ لاءِ 700 ڪنٽينرن ذريعي رستا بند ڪيا ويا آهن. 220 ڪلوميٽر جي علائقي ۾ هر هڪ ڪلوميٽر جي وٿي تي 3 ڪنٽينر رکيا ويا آهن. سوشل ميڊيا تي ماڻهو ڪاوڙ جو اظهار ڪري رهيا آهن ته اسڪول بند پيل آهن ۽ روڊن جي بند هجڻ سبب هو پنهنجي پيارن کي علاج لاءِ اسپتال نه پيا وٺي وڃي سگهن. پوليس ذريعن موجب ڪنٽينر ڪرائي تي ورتا ويندا آهن ۽ هڪ ڪنٽينر جو 40 هزار ڪرايو هجي ته ڪل لاڳت 2 ڪروڙ 80 لک رپيا ٿيندي. ٻئي پاسي گڊز ٽرانسپورٽرن کي شڪايت آهي ته پوليس خالي ڪنٽينر جبري روڪي کڻائي وٺندي آهي، نقصان اهو ئي ڀريندو آهي جنهن جو ڪنٽينر ۽ سامان هوندو آهي. هوڏانهن اسلام آباد جي رهواسي جوڙي خولا ۽ قاسم ڪنٽينر سامهون شادي جو فوٽو شوٽ ڪرائي ان کي يادگار بڻايو ۽ تصويرون شيئر ڪيون.
