پنوعاقل/سکر (رپورٽ: رستم انڍڙ/آزاد مهر ) پنوعاقل جي ڪچي گدپور ٿاڻي جي حد ڪچي جي سرڳو دم دمو پوليس چوڪي تي ڌاڙيلن جي جديد هٿيارن سان پوليس مٿان فائرنگ هڪ ڪري ڏني، جنھن جي نتيجي ۾ پوليس اهلڪار اربيلو چاچڙ شهيد ٿي ويو ۽ هڪ پوليس اهلڪار رضا محمد مگسي زخمي ٿي پيو، اطلاع تي گدپور ٿاڻي، سڌهوجا ٿاڻي، پنوعاقل ٿاڻي ۽ بائيجي ٿاڻي جي پوليس پهچي شهيد ٿي ويل پوليس اهلڪار ۽ زخمي کي پنوعاقل تعلقي اسپتال پهچايو ھو، هوڏانهن فرض نڀائيندي شهيد ٿي ويل پوليس اهلڪار اربيلو چاچڙ کي پوليس اعزاز سان مٽي ماءُ حوالي ڪيو ويو، شھيد اهلڪار جي جنازي نماز پوليس لائن هيڊڪوارٽر سکر ۾ ادا ڪئي وئي. شهيد پوليس اهلڪار جي جنازي نماز ۾ ڊي آءِ جي سکر فيصل عبدالله چاچڙ، ايس ايس پي سکر امجد احمد شيخ، سيڪٽر ونگ ڪمانڊر برگيڊيئر نديم ۽ ٻين پوليس آفيسرن ،اهلڪارن، صحافين، سياسي ۽ سماجي شخصيتن وڏي انگ ۾ شرڪت ڪئي، سکر پوليس اسڪواڊ شهيد جي مڙهه کي سلامي ڏني، شهيد جي مڙهه کي پاڪستان ۽ سنڌ پوليس جي جهنڊن ۾ لپيٽيو ويو. ان موقعي تي ڊي آءِ جي سکر جو چوڻ ھو ته شهيد پوليس اهلڪارن جون قربانيون ڪڏهن به رائيگان نه وينديون، ايس ايس پي سکر امجد احمد شيخ چيو ته پوليس جا حوصلا بلند آهن ۽ ڏوهارين خلاف آپريشن حتمي نتيجي تائين جاري رهندو، جنازي نماز بعد شھيد اهلڪار جي مڙھ کي آبائي قبرستان ۾ مٽي ماءّ حوالي ڪيو ويو.
