اسلام آباد (م ڊ) پي ٽي آءِ باني عمران خان جي زال بشريٰ بي بي عدالت ۾ بيان ڏيندي روئي ڏنو. اسلام آباد جي ڊسٽرڪٽ اينڊ سيشن ڪورٽ ۾ عمران خان جي 6 ۽ بشريٰ بي بي جي هڪ ڪيس ۾ ضمانت واري درخواست تي ٻڌڻي ٿي جنهن ۾ بشريٰ بي بي عدالت ۾ پيش ٿي. ٻڌڻي ايڊيشنل سيشن جج محمد افضل ماجوڪا ڪئي. ٻڌڻي دوران بشريٰ بي بي روسٽرم تي اچي چيو ته مان انصاف جي ڪرسي تي ويٺل منصفن جي 9 مهينن کان ناانصافي جو شڪار آهيان، عمران خان ۽ مون کي ناانصافي ڪري سزا ڏني وئي. هن چيو ته اسان جي وڪيلن سميت سڀ وڪيل رڳو وقت ضايع ڪن ٿا، جيڪو اندر ۾ انسان ويٺو آهي ڇا اهو انسان ناهي؟ ڪنهن جج کي نظر نٿو اچي؟ مان هاڻي هن عدالت ۾ نه اينديس ڇو ته هتي رڳو ناانصافيون ٿينديون آهن. ٻڌڻي دوران بشريٰ بي بي روئي ڏنو ۽ چيو ته انصاف ته آهي ئي نه، مان انصاف لاءِ ناهيان آئي، منهنجو ڪمبل ۽ ٻيو سامان گاڏي ۾ آهي جيڪو اوهان چوندا ته مان جيل کڻي وڃڻ لاءِ تيار آهيان. عدالت عمران خان ۽ بشريٰ بي بي جي هڪ ڪيس جي حد تائين ضمانت واري درخواست تي فيصلو محفوظ ڪري ورتو ۽ 6 ڪيسن ۾ ضمانت جي درخواست تي جيل سپرنٽينڊنٽ کي عمران خان جي وڊيو لنڪ تي حاضري يقيني بڻائڻ جي هدايت ڪري ڇڏي. ٻڌڻي 18 نومبر تائين ملتوي ڪئي وئي.
