اطلاع آهن ته جي يو آءِ سربراهه مولانا فضل الرحمان ۽ پ پ پ چيئرمن جناب بلاول ڀٽو زرداري وچ ۾ 26آئيني ترميم بابت اتفاق ٿي ويو آهي ايوان صدر به پ پ پ جي اهڙي مسودي ۽ جي يو آءِ جي مسودي ۾ ڏنل تجويزن تي متفق آهي جڏهن ته ن ليگ به پ پ پ ۽ جي يو آءِ جي گڏيل مسودي تي سر تسليم خم ڪري ڇڏيو آهي جنهن تي ن ليگ سربراهه ميان محمد نواز شريف به پنهنجي حمايت جو اظهار ڪري چڪو آهي.هاڻ ٽنهي پارٽين جي گڏيل مسودي کي جيڪو اڃا عوام تائين سامهون ناهي آندو ويو ان کي پارليامينٽ ۾ پيش ڪرڻ لاءِ سڀاڻي 17 آڪٽوبر تي قومي اسيمبلي ۽ سينيٽ جا الڳ الڳ اجلاس ڪوٺايا ويا آهن جنهن کان اڳ وفاقي ڪابينا جي اجلاس ۾ انجي منظوري ورتي ويندي.ملڪ جي سڀ کان وڏي پارٽي پي ٽي آءِ اهڙي ڪنهن به مسودي تي راضي ناهي ۽ اها پارليمينٽ ۾ ڪنهن به صورت ۾ ووٽ نه ڪندي.
جي يو آءِ سربراه مولانا فضل الرحمان جنهن ڏينهن اڌ اڳ ميرپورخاص ۾ هڪ ميڙ کي خطاب ڪندي اهڙي ڪنهن به آئيني مسودي کي مڃڻ کان انڪار ڪيو هو جيڪو قوم جي مفادن کان هٽي ڪري هوندو ۽ هن انهي حد تائين چيو هو مسودي تي غور ويچار ڪرڻ لاءِ کيس گهٽ ۾ گهٽ 9 ڏهاڙا ته گهرجن ۽ انهي مسودي تي جي يو آءِ جو فوري متفق ٿيڻ ۽ اسيمبلي ۾ آڻڻ تي عوام پڇا ڪري پيو ته مولانا کي آخر ڪهڙي مجبوري پيش آئي جو هو ايترو جلد ۽ تڪڙو پ پ پ جي مسودي تي پنهنجو سر تسليم خم ڪري چڪو آهي ۽ اها حڪومت جنهن کي هو تسليم نٿو ڪري فارم 17 جي ۽ جعلي حڪومت سڏي چڪو آهي ۽ انجي مستعفي ٿيڻ جا مطالبا پئي ڪيا تنهن ۾ ايتري جلد تبديلي ڇو آئي جو هن پ پ پ جي آئيني مسودي کي پارليامينٽ ۾ آڻڻ تي راضي ٿي ويو. ٿيڻ ته ايئن گهربو هو جو آئيني ترميم وارن مسودن کي قوم آڏو ظاهر ڪري انتي عوامي راءِ ورتي وڃي ها پر خبر ناهي ته حڪومت سميت پ پ پ ۽ جي يو آءِ اهڙن مسودن کي لڪائڻ جي ضرورت ڇو پئي ۽ آخر کين ڪهڙي مجبوري هئي جو اهي 25 آڪٽوبر کان اڳ پاس ڪرائڻ ۽ انتي عمل ڪرائڻ چاهين ٿا.ٻي ڪا خاص مجبوري ڏسڻ ۾ نٿي اچي صرف موقعي جي تلاش اٿن ته سپريم ڪورٽ جو چيف جسٽس به پنهنجو اٿن قومي اسيمبلي ۽ سينيٽ جا اسپيڪر ۽ چيئرمن به سندن آهن صدر به پنهنجو اٿن ۽ چيف اليڪشن ڪمشنر به سندن آهي ۽ هاڻ مخالفن کي ڦيرائڻ ۽ انهن جو ووٽ وٺڻ جو به وقت آهي تنهنڪري اها ترميم 25 کان اڳ ڪرائي وڃي متان نئين چيف جسٽس اچڻ ڪري ڪو مسئلو کڙو نه ٿئي ۽ رڪاوٽون پيش اچن.
ڏٺو وڃي ته اسلام آباد ڪوئٽيا ۽ ڪراچي ۾ وڪيلن جي تنظيمن جا اجتماع ۽ ڪنوينشن ٿيا آهن جن ۾ حڪومتي روين انجي سياسي ڏاڍ سميت ڪنهن به اهڙي آئيني ترميم جي سخت مخالفت ڪئي آهي ۽ ويڙهاند جو اعلان ڪري چڪا آهن جنهن سان به حڪومت ۽ سگهارن ادارن کي ڊيڄاري ڇڏيو آهي.جيڪڏهن پي ٽي آءِ جي ميمبرن کي اغوا ڪرائي يا طاقت جي زور تي ڦيرائي اهڙي ڪا به آئيني ترميم پاس ڪرائي وڃي ٿي ته پي ٽي آءِ به خاموش نه ويهندي هن وقت جيڪي سياسي ۽ امن امان جون حالتون خراب آهن جنهن سان معاشي ۽ سياسي بحران پئدا ٿيڻ جا امڪان آهن جنهن کان بچڻ جي ضرورت آهي.پي ٽي آءِ جو چوڻ آهي ته سندن ڪجهه سينيٽر ۽ قومي اسيمبلي جا ميمبر اغوا ۽ گرفتار ڪيا ويا آهن جن تي تشدد ڪري وفاداريون تبديل ڪرائڻ جي ڪوشش ٿي رهي آهي.
25 آڪٽوبر کان اڳ تڙ تڪڙ ۾ آئيني ترميم پاس ڪرائڻ جو خاص مقصد اهو به سامهون آهي ته حڪومت سپريم ڪورٽ جي چيف جسٽس مقرر ڪرڻ جا اختيار پاڻ وٽ ڪنهن ڪميشن وسيلي رکڻ چاهي ٿي جنهن لاءِ پنجن سينئر ججن جو پئنل ٺاهڻ ۽ سيد منصور علي شاهه جو رستو روڪڻ آهي اهو ئي سبب ته آهي سيد منصور علي شاهه جي بطور چيف جسٽس ٿيڻ وارو نوٽيفڪيشن اڃا ناهي نڪتو جڏهن ته موجوده چيف جسٽس جي رخصتي ۾ وڃي ڪو هفتو بچيو آهي.سپريم ڪورٽ جا جج جيڪي اڪثريت ۾ آهن سي ڪنهن به صورت ۾ ميرٽ جي لتاڙ ڪري سينئر ججن کي نظرانداز ڪرڻ جي اجازت نه ڏيندا ۽ اڳتي هلي اهڙي ڪنهن به تڪڙي ترميم سان ڪو عدالتي بحران پئدا ٿي سگهي جنهن لاءِ خود حڪومت کي بحران مان نڪرڻ جو رستو نه ملي سگهي.اهي به اطلاع آهن موجوده چيف جسٽس جي رخصتي ۽ نئين چيف جسٽس جي آجيان لاءِ ايوان صدر ۾ تقريبات جا انتظام ٿي رهيا آهن.اهي به اطلاع آهن ته مجوزه آئيني عدالت يا آئيني بئنچ جو سربراهه پ پ پ جو ڪو حمايت يافته رٽائرڊ چيف جسٽس ئي مقرر ٿي سگهي جنهن جي نالي تي اتفاق به ٿي سگهي ٿو.
پ پ پ جي چيئرمن بلاول ڀٽو زرداري جي ضرورت ۽ مجبوري ته سمجهه ۾ اچي ٿي پر جي يو آءِ سربراهه کي ڪهڙي ضرورت ۽ مجبوري آهي جو هن تڙ تڪڙ ۾ پ پ پ ۽ حڪومت جي آئيني مسودي آڏو سر تسليم خم ڪري ڇڏيو جنهن حڪومت کي هن هر هنڌ جعلي ۽ غيرآئيني پئي سڏيو.سياسي ۽ عوامي حلقن ۾ چئوٻول آهن ته مولانا پ پ پ ۽ سگهارن قوتن سان ڪا ڊيل ڪئي آهي مطلب ته کيس به ان حڪومت ۾ چڱو خاصو حصو ملندو جيڪا امڪاني آئيني ترميم جي منظوري بعد اچي سگهي ٿي جنهن جو وزيراعظم پ پ پ مان ٿيڻ جا امڪان آهي ۽ مولانا کي به ڪي پي ڪي جي گورنرشپ بلوچستان جي وڏ وزارت ۽ ڪجهه وفاقي وزيرن جا عهدا ملندا.بهرحال نئون وزير اعظم ڪير به ٿئي شهباز شريف کان سگهاريون ڌريون به جان ڇڏائڻ گهرن ٿيون جو هو ناڪام وزيراعظم ثابت ٿيو آهي.باقي جي يو آءِ جي سربراهه جيڪڏهن ڪنهن آسري تي ڪنهن قسم جي ڪا ڊيل ڪئي آهي يا ڪري ٿو جنهن سان عوام جي خواهشن خلاف ڪا تڪراري آئيني ترميم ٿئي ٿي ته انجا مولانا تي به اڳتي هلي سياسي اثر پئجي سگهن ٿا ۽ سندس جماعت عوامي حمايت وڃائي سگهي ٿي.
هوڏانهن سياسي ذريعا اهو به ٻڌائي رهيا آهن ته پي ٽي آءِ به پنهنجي حڪمت عملي تيار ڪري ورتي آهي جنهن ۾ اها ترميم کان اڳ وزيراعظم محمد شهباز شريف خلاف عدم اعتماد جي تحريڪ آڻيندي يا کيس اعتماد جو ووٽ لاءِ زور ڀريندي جنهن سان ن ليگ به ڪجهه پريشان ڏسڻ ۾ پئي اچي جو پهريان عدم اعتماد جو فيصلو ڪرڻو پوندو جنهن سان مجوزه ترميم ڪجهه ڏينهن موخر ٿي سگهي ٿو.ن ليگ ڪنهن اهڙي امڪاني عدم اعتماد واري رٿ کي روڪڻ لاءِ ڪوششون۽وٺي رهي آهي ۽ اتحادين کي به هوشيار ڪري ڇڏيو آهي.اهي به ڳالهيون گردش ۾ آهن ته حڪومت جون هڪ اڌ اتحادي پارٽيون به حڪومت مان خوش ناهن جن کي به پرچائڻ لاءِ حڪومت کي وقت لڳي سگهي ٿو خاص ڪري ايم ڪيو ايم جيڪا صوبي جو مطالبو ڪري رهي آهي.مولانا به شايد ئي کيس اعتماد جو ووٽ ڏئي ۽ ٽري پاسو ڪري. جڏهن پارليامينٽ جا اجلاس ٿين ته پ پ پ ۽ مولانا جا اٺ ڪهڙي پاسي ليٽين ٿا.جيڪڏهن مجوزه آئيني ترميم ۾ ڪا رڪاوٽ پوي ٿي يا دير ٿئي ٿي اهڙي صورت ۾ به وزيراعظم جو گهيرو وڌيڪ تنگ ٿيندو ۽ حڪومتي واڳون ڪو ٻيو سنڀالي جنهن جا اڳ ئي چئوٻول هلن پيا ۽ ن ليگ ۽ انجو سربراهه ميان محمد نواز شريف به بلاول جيان اڳ ۾ ئي مجبور آهي ۽ هو ڪنهن به صورت ۾ پ پ پ ۽ جي يو آءِ قيادت کان پري نه ويندو ته جيئن سگهارن جي حڪومت سگهاري ٿي سگهي. ميان محمد شهباز شريف قرباني جو ٻڪرو بڻجي چڪو آهي ۽ قرباني ڏيڻ سندس مجبوري آهي.پي ٽي آءِ به سندس گهيرو تنگ ڪرڻ لاءِ اڄ کان احتجاج جو اعلان ڪري ڪارڪنن کي ميدان تي لاهڻ جو فيصلو ڪري ڇڏيو آهي.
