لاهور ( بيورو+م ڊ ) امير جماعت اسلامي حافظ نعيم الرحمان چيو آهي ته آئيني ترميمي بل موجوده صورتحال ۾ ملڪ لاءِ خطرناڪ ثابت ٿيندو، حڪومت سپريم ڪورٽ ۾ پنهنجي پسند جا جج لڳائڻ چاهي ٿي ۽ ان لاءِ حربا استعمال ڪري رهي آهي.لاهور ۾ ميڊيا سان ڳالهائيندي حافظ نعيم الرحمان چيو آهي ته حڪومت ان معاملي تي ڌيان نه ڏئي ڇو ته موجوده صورتحال ۾ بل ملڪ لاءِ خطرناڪ ثابت ٿيندو. هن چيو ته خيبرپختونخواهه ۽ بلوچستان جا مسئلا اٿڻ شروع ٿي ويا آهن، آمريڪا نوازي ڌرين سبب ملڪ ۾ عدم تحفظ پيدا ٿيو آهي، آل پارٽيز ڪانفرنس سڏائڻ حڪومت جو فرض آهي.جماعت اسلامي جي امير چيو آهي ته جمهوري آزادي هئڻ گهرجي، جلسن ۽ احتجاجن جي اجازت ملڻ گهرجي، علي امين گنڊاپور جيڪڏهن سنجيده آهي ته وفاق کي آن بورڊ وٺي افغانستان سان ڳالهه ڪري، جيڪڏهن مروت ۾ جرڳا ڪامياب ٿي سگهن ٿا. يا بنون، پوءِ ملڪ ۾ ڪٿي به ٿي سگهي ٿو. هن چيو ته علي امين گنڊاپور کي سڄي قوم کان معافي وٺڻ گهرجي، هن صحافين جي نه پر قوم جي بي عزتي ڪئي آهي. حافظ نعيم الرحمان اهو به چيو ته سلمان اڪرم راجا جي بيان جو نوٽيس ورتو وڃي ۽ انڪوائري ڪئي وڃي.
