راولپنڊي(م ڊ) تحريڪ انصاف جي باني عمران خان چيو آهي ته هي حڪومت رڳو ڪوڙ تي هلي رهي آهي، منهنجو اسٽيبلشمينٽ سان ڪنهن به قسم جو رابطو ناهي، جيڪڏهن ٿيو ته صرف ملڪ ۽ آئين لاءِ هوندو. اڊيالا جيل ۾ صحافين سان غير رسمي ڳالهه ٻولهه ڪندي پي ٽي آءِ باني چيو ته هڪ سفارشي ڪرڪيٽ کي تباهه ڪري ڇڏيو آهي، ان جي پويان طاقتور ماڻهو آهن، محسن نقوي جي ڪهڙي اهليت آهي، هو 2008 ۾ نيب جو سٽيل ۽ سفارشي آهي، هن ڪرڪيٽ کي تباهه ڪيو، دبئي ۾ 5 ملين ڊالر جي ملڪيت سندس زال جي نالي تي آهي، هو ڪڻڪ اسڪينڊل ۾ ملوث آهي. هن سڄي ملڪ ۾ وڏي فراڊ واري اليڪشن ڪئي.هن چيو ته بلوچستان ۽ ملڪ ۾ امن امان جي صورتحال سڀني جي سامهون آهي، خيبرپختونخواهه ۽ بلوچستان ۾ روز شهيدن جا واقعا ٿي رهيا آهن، پنجاب ۾ چوريون، ڦرون ۽ پوليس اهلڪارن کي شهيد ڪيو وڃي.هن چيو ته وڏيون ملٽي نيشنل ڪمپنيون ۽ پروفيشنل ملڪ ڇڏي رهيا آهن، جيڪڏهن عوام تنقيد ڪري ٿو ته هو ڊيجيٽل دهشتگرد چئي ٿا ڇڏين، منهنجي اپيل آهي ته فوج اسان سڀني جي آهي، ملڪ کي مضبوط اداري جي ضرورت آهي، هي جيڪو ڪجهه ڪري رهيا آهن اهو آپگهات آهي.هنن چيو ته جنهن سيل ۾ مون کي رکيو ويو آهي اهو تندور وانگر گرم آهي، تنهن ڪري پگهرجي ويندو آهيان، تنهن هوندي به مون کي ڪو به رليف نه آهي.صحافي سوال ڪيو ته توهان بار بار آرمي چيف تي الزام لڳائي رهيا آهيو ته هو توهان کي ڇو ماريندو؟ عمران خان چيو ته مون کي ٻه ڀيرا مارڻ جي ڪوشش ڪئي وئي، آءِ ايس آءِ سي سي ٽي وي فوٽيج چوري ڪئي، جتي مون تي حملو ڪيو ويو، جنهن جاءِ تي حملو ڪيو ويو ان جو ڪنٽرول رات جو آءِ ايس آءِ پنهنجي قبضي ۾ ورتو.هن چيو ته جيل ۾ وڌيڪ سختي آهي، ان جو مطلب آهي ته سندن ٽنگون ڏڪي رهيون آهن، جيڪڏهن مون کي ڪجهه ٿيو ته ذميوار جنرل عاصم منير ۽ ڊي جي آءِ ايس آءِ هوندا، ڇو ته مون سان گڏ مقرر اسٽاف کي چوٿون ڀيرو تبديل ڪيو ويو.پي ٽي آءِ جي باني چيو ته هي مون کي فراهم ٿيندڙ کاڌو چيڪ ڪندا آهن ته ان ۾ زهر ناهي، اهو سڀ آءِ ايس آءِ جي ڪنٽرول ۾ آهي، مان ٻيهر چئي رهيو آهيان ته مون کي ڪجهه ٿيو ته ان جو ذميوار آرمي چيف ۽ ڊي جي آءِ ايس آءِ هوندا.
