ڪوئيٽا(م ڊ) بلوچستان جي سامونڊي شهر گوادر ۾ بلوچ يڪجهتي ڪميٽي پاران ڌرڻو ختم ڪرڻ کانپوءِ 72 ڪلاڪن دوران 8 هنڌن تي وڏا جلسا ڪيا ويا.ڪالهه سومر تي ٻن هنڌن تي ٻه وڏا جلسا ڪيا ويا، انهن مان هڪ افغانستان جي سرحد سان لڳل ضلعي نوشڪي جي هيڊ ڪوارٽر نوشڪي ۾، جڏهن ته ٻيو ڪالهه شام جو ڪوئيٽا ۾ ٿيو.بلوچ يڪجهتي ڪميٽي جي اڳواڻ صبغت الله بلوچ جو چوڻ آهي ته 28 جولاءِ تي گوادر ۾ بلوچ يڪجهتي ڪميٽيءَ پاران صرف 6 کان 7 ڪلاڪن لاءِ بلوچن جو ميڙاڪو ڪرڻو هو پر رياستي ادارن جي مبينا ظلم، جبر ۽ تشدد جي ڪري اڄ بلوچستان جي هر بلوچ آبادي واري علائقي ۾ جلسو آهي.ڪوئيٽا ۾ بلوچ يڪجهتي ڪميٽي پاران سرياب جي علائقي شاهواڻي اسٽيڊيم ۾ جلسو ٿيو، جنهن ۾ عورتن سميت هزارين ماڻهن شرڪت ڪئي.اسٽيج تي انهن کي ويهاريو ويو جيڪي مستونگ ۾ ڪوئيٽا کان گوادر ويندڙ قافلي تي فائرنگ ۾ زخمي ٿيا هئا، ڪوئيٽا ۽ نوشڪي ۾ جلسن کي ڊاڪٽر مها رنگ بلوچ، وهاب بلوچ، صبغت الله شاهه، ڊاڪٽر صبيحه بلوچ ۽ بيبرگ بلوچ خطاب ڪيو.ڊاڪٽر ماهه رنگ بلوچ چيو ته انگريزن جي دور کان وٺي هڪ منصوبي تحت بلوچن کي مختلف طريقن سان ورهايو ويو ۽ ڪمزور ڪيو ويو.هن چيو ته متحد نه ٿيڻ سبب بلوچ اڄ مختلف ظلمن جو شڪار آهن ۽ جيڪڏهن انهن ظلمن مان ڇوٽڪارو حاصل ڪرڻو آهي ته انهن کي قبيلائي خول مان نڪرڻو پوندو ۽ متحد ٿيڻو پوندو.صبغت الله شاهه چيو ته رياست ۽ رياستي ادارا اڃا تائين بلوچن جي نفسيات کان بي خبر آهن، ڇاڪاڻ ته هو سمجهن ٿا ته جيڪڏهن گوليون هلايون ته ڀڄي ويندا، پر کين خبر ناهي ته بلوچ مقابلو ڪندا آهن، جنهن جو اظهار هي وڏا جلسا آهن.هن چيو ته رياستي ادارن تشدد ڪري گوادر ۾ ميڙاڪي کي ختم ڪرڻ لاءِ خوف جو ماحول پيدا ڪيو پر گوادر ۾ نه رڳو جلسو ٿيو پر ان کانپوءِ هر شهر ۾ جلسو ٿي رهيو آهي.بيبرگ بلوچ چيو ته جيڪي چوندا هئا ته بلوچ اتحاد ڪميٽي هڪ جٿو آهي اهي اڄ هتي اچن ۽ ڏسن ته بلوچ عوام بلوچ اتحاد سان گڏ بيٺو آهي.
