گوادر(م ڊ) گوادر سميت بلوچستان جي مختلف شهرن ۾ بلوچ يڪجهتي ڪميٽي جا ڌرڻا جاري آهن، حڪومت ۽ ڌرڻي وارن ۾ اڳڀرائي نه ٿيڻ تي نيشنل پارٽي وفاقي حڪومت کي ڪردار ادا ڪرڻ جي اپيل ڪئي آهي. ان سلسلي ۾ ڊاڪٽر مالڪ بلوچ وزيراعظم سان رابطو ڪيو آهي. نيشنل پارٽي جي سربراهه مير اشرف حسين بلوچ ۽ بلوچستان جي اڳوڻي وڏي وزير ڊاڪٽر عبدالمالڪ بلوچ اڱاري ڏينهن نيشنل پارٽي جي مرڪزي اڳواڻ ۽ آل پارٽيز گوادر جي ميمبر سان فون تي رابطو ڪري ڳالهين ۾ ڊيڊ لاڪ بابت آگاهي ڏني. بلوچ يڪجهتي ڪميٽي ۽ حڪومت پاران خدشن جو اظهار ڪندي چيو ويو ته جيڪڏهن مسئلا ڳالهين ذريعي حل نه ٿيا ته وڌيڪ مشڪلاتون پيدا ٿي سگهن ٿيون ۽ طاقت جي استعمال سان صورتحال خراب ٿي سگهي ٿي. ان سلسلي ۾ ڊاڪٽر عبدالمالڪ بلوچ وزير اعظم پاڪستان ميان شهباز شريف، بلوچستان جي وڏي وزير مير سرفراز خان بگٽي ۽ قومي اسيمبلي جي اسپيڪر سردار اياز صادق سان رابطو ڪري پرامن ڳالهين ذريعي مسئلن کي حل ڪرڻ تي زور ڏنو ۽ ان ڳالهه جو اظهار ڪيو ته طاقت جي استعمال سان حالتون وڌيڪ پيچيده ٿينديون، پريشانيون وڌنديون. ڪوئيٽا ۾ بلوچ ايڪتا ڪميٽي جي اڳواڻ بيبرگ بلوچ جو چوڻ آهي ته حڪومت مطالبن تي عمل ڪرائڻ لاءِ عملي قدم نه کڻي رهي آهي. هوڏانهن بلوچستان جي گهرو وزير مير ضياءُ الله لانگو دعويٰ ڪئي آهي ته بلوچ سوليڊريٽي ڪميٽي جا مطالبا مڃيا ويا آهن پر ڌرڻا غير جواز طور تي طويل ڪيا پيا وڃن. اهي شخصيتون جن گوادر ۾ حڪومت ۽ بلوچ سوليڊريٽي ڪميٽي وچ ۾ ٽياڪڙي جو ڪردار ادا ڪيو. گوادر مان نيشنل پارٽي جو سينيئر اڳواڻ اشرف حسين به انهن ۾ شامل هو.
