سنڌ ۾ ايندڙ هفتي سخت گرمي جي لهر جي اڳڪٿي

اسلام آباد ( بيورو+ م ڊ ) ملڪ جي اڪثر علائقن ۾ شديد گرمي جي لهر جاري آهي، جنهن دوران سنڌ صوبي ۾ ايندڙ هفتي ’هيٽ ويو‘ جو خدشو ظاهر ڪيو پيو وڃي.  موسميات کاتي خبردار ڪيو آهي ته ايندڙ ڪجهه ڏينهن دوران ملڪ جي اڪثر علائقن ۾ سخت گرمي جي لهر برقرار رهندي.  اڄ صوبائي ڊيزاسٽر مئنيجمينٽ اٿارٽي (پي ڊي ايم اي) سنڌ به ان خدشي جو اظهار ڪيو آهي ته صوبي ۾ ايندڙ هفتي دوران سخت گرمي جاري رهندي.  ان حوالي سان پي ڊي ايم اي سنڌ صوبي ۾ 21 مئي کان 23 مئي تائين هيٽ ويو الرٽ جاري ڪري ڇڏيو آهي.  اسلام آباد ۾ پي ايم ڊي ۾ ريسرچ اينڊ ڊولپمينٽ جي ڊائريڪٽر ڊاڪٽر محمد افضل، گرمي جي لهر جي تعريف ڪئي آهي ته جيئن گرمي پد 3 يا وڌيڪ ڏينهن تائين 5 ڊگري سينٽي گريڊ کان مٿي رهي.

1. مختيار باچا سياسي ۽ نظرياتي ماڻهن کي متحد ڪندو هو: جان بليدي

اسلام آباد (بيورو) نيشنل پارٽي پنجاب پاران مختيار باچا کي خراج عقيدت پيش ڪرڻ لاءِ تعزيتي ريفرنس اسلام آباد ۾ ٿيو، ريفرنس ۾ اين پي جي سيڪريٽري جنرل سينيٽر جان محمد بليدي خطاب ڪندي چيو ته هن هميشه باچا کي پنهنجي سياسي سوچ ۾ واضح ڏٺو. باچا 12-2011 تائين پارٽي سان لاڳاپيل رهيو. باچا سڄي ملڪ جي سياسي ۽ نظرياتي ساٿين ۽ ترقي پسند سياسي قوتن کي متحد ۽ متحرڪ ڪرڻ چاهيو، پر بدقسمتيءَ سان سندس سمورين ڪوششن باوجود اهڙو اتحاد ممڪن نه ٿي سگهيو. هن چيو ته کاٻي ڌر جا سياسي ۽ نظرياتي ساٿي ملڪ ۾ ڪيترين ئي سياسي پارٽين جي قيام ۾ بنيادي حيثيت رکن ٿا. هن ڪردار ته ادا ڪيو پر هو پنهنجي صفن کي سڌاري نه سگهيو. اڳوڻي سينيٽر فرحت الله بابر چيو ته بزرگ ڏاهي اڳواڻ ڪڏهن به اصولن تي سمجهوتو نه ڪيو. هو کاٻي ڌر جي نظريي تي يقين رکندو هو ۽ پنهنجي سياسي اصولن تي ڪڏهن به سمجهوتو نه ڪندو هو. انساني حقن ۽ جمهوريت لاءِ وڙهڻ کان علاوه هن سماج جي مظلوم ۽ پسمانده طبقن جي حقن لاءِ به وڏي جدوجهد ڪئي. اين پي پنجاب جي صدر ايوب ملڪ چيو ته کاٻي ڌر جي بزرگ اڳواڻ ڪميونسٽ پارٽي ۾ شامل ٿي سياست جي شروعات ڪئي. هن جي سوچ سخت نه هئي ۽ هن انهن سڀني جي حمايت ڪئي جيڪي هڪ انصاف واري سماج لاءِ ڪم ڪرڻ چاهيندا هئا. ترقي پسند قوتن کي گهرجي ته پاڪستاني سياست ۾ پنهنجي لاءِ گنجائش پيدا ڪن ۽ عام ماڻهن تائين پهچن. ايوب ملڪ چيو ته باچا کي غير سياسي ڪرڻ جي سوچ کان نفرت هئي. باچا ان ڳالهه تي پختو يقين رکندو هو ته سياست ۾ فعال شموليت کانسواءِ ڪا به تبديلي ممڪن ناهي، ان ڪري هو پنهنجي آخري ڏينهن تائين سياسي طور تي سرگرم رهيو، سندس وفات سان نيشنل پارٽي ۽ ملڪ جي سموري ترقي پسند پارٽين کي وڏو نقصان پهتو آهي. تقريب ۾ ايم اين اي ڦلين بلوچ، پي ايف يو جي اڳواڻ ناصر زيدي، عصمت جهان ۽ ٻين سياسي ۽ سماجي اڳواڻن شرڪت ڪئي.

1. دبئي ليڪس جي جاچ لاءِ لاهور هاءِ ڪورٽ ۾ درخواست داخل

لاهور (بيورو) دبئي ليڪس جي جاچ لاءِ ايف آءِ اي، ايف بي آر ۽ نيب کان جاچ ڪرائڻ لاءِ  لاهور هاءِ ڪورٽ ۾ درخواست داخل ڪئي وئي آهي. لاهور هاءِ ڪورٽ ۾ شهري مشڪور  حسين طرفان نديم سرور ايڊووڪيٽ ذريعي درخواست داخل ڪئي وئي، جنهن ۾ وفاقي حڪومت، نيب، ايف آءِ اي ۽ ٻين کي ڌر بڻايو ويو آهي. درخواست ۾ چيو ويو آهي ته دبئي ليڪس ۾ ڪيترن ئي پاڪستاني سياستدانن ۽ ڪاروباري شخصيتن جا نالا  آيا آهن، هر سياستدان لاءِ ضروري آهي ته هو پنهنجي سمورين ڏيهي ۽ پرڏيهي ملڪيتن کي ظاهر ڪري. درخواست ۾ التجا ڪئي وئي ته دبئي ليڪس جي جاچ جو حڪم ڏئي ته دبئي ۾ خريد ڪيل پراپرٽي مني لانڊرنگ ذريعي نه ٺاهي وئي. درخواست ۾ التجا ڪئي وئي ته دبئي ۾ غير قانوني ملڪيتن جي تصديق ٿيڻ تي مالڪن خلاف ڪارروائي جو حڪم ڏنو وڃي.

1. ججن جو مسئلو عدالت کان ٻاهر حل ڪرڻو پوندو: راڻاثناءَالله

اسلام آباد ( بيورو+م ڊ )   وزيراعظم جي سياسي معاملن واري صلاحڪار راڻا ثناءُ الله چيو آهي ته خيبرپختونخواهه حڪومت  اهو ڪندي جيڪو وفاق چوندو، وڏو وزير ڪي پي ڪي ٽيس مار خان آهي. ن ليگ اڳواڻ امير مقام چيو ته ڪي پي جو وڏو وزير انتشار ۽ افراتفري چاهي ٿو.پارليامينٽ هائوس ٻاهران ميڊيا سان ڳالهائيندي راڻا ثناءُ الله چيو ته علي امين گنڊاپور هوائي فائرنگ ڪري رهيو آهي، هن وٽ ڪجهه به ناهي. هن چيو ته جيڪڏهن اسٽيبلشمينٽ پي ٽي آءِ سان ڳالهه ڪري ٿي ته پوءِ اسان ان کي ڇو روڪيون، سندن جهيڙو شروع کان ئي اسٽيبلشمينٽ سان آهي. هن چيو ته پي ٽي آءِ پنهنجي دور حڪومت ۾ اپوزيشن کي ختم ڪرڻ چاهي پئي، جڏهن اسٽيبلشمينٽ ساٿ نه ڏنو ته هنن چيو ته ميرجعفر، ميرصادق آهن، هي پي ٽي آءِ جو جهيڙو آهي، اسٽيبلشمينٽ کي مداخلت ڪرڻ گهرجي.