پاڪستان ڪرڪيٽ ٽيم جي اڳوڻي ڪپتان شاهد آفريدي چيو آهي ته هڪ بهترين بيٽنگ وڪيٽ تي قومي ٽيم وڌيڪ رنسون نه ٺاهي سگهي.
نيوزيلينڊ خلاف ٽئين ٽي ٽوئنٽي مئچ ۾ شڪست تي شاهد آفريدي جو چوڻ هو ته پاڪستان ٽيم کي اهڙي وڪيٽ تي 220 رنسون ٺاهڻ گهرجن ها، شاداب خان بهتر کيڏيو، باقي بيٽرز کي به اهڙي ڪنڊيشن ۽ وڪيٽ تي بهتر اسٽرائيڪ ريٽ رکڻ گهرجي.
ياد رهي ته گذريل ڏينهن ٽئين ٽي ٽوئنٽي مئچ ۾ ڪمزور نيوزيلينڊ ٽيم قومي ٽيم کي ستن وڪيٽن تان شڪست ڏئي ڇڏي هئي.
پنڊي ڪرڪيٽ اسيڊيم ۾ کيڏي ويندڙ ان مئچ ۾ پاڪستان نيوزيلينڊ ٽيم کي کٽڻ لاءِ 179 رنسن جو ٽارگيٽ ڏنو هو جيڪو مهمان ٽيم 19هين اوور ۾ مڪمل ڪري ورتو.
