اسلام آباد(م ڊ) سپريم ڪورٽ ۾ اڳوڻي وزيراعظم ذوالفقار علي ڀٽو جي ڦاهي خلاف صدارتي ريفرنس جي ٻڌڻي 4 مارچ تائين ملتوي ڪئي وئي آهي، جنهن دوران جسٽس مسرت هلالي چيو آهي ته ذوالفقار علي ڀٽو جي بنيادي حقن کان انڪار ڪيو ويو آهي. چيف جسٽس آف پاڪستان قاضي فائز عيسيٰ جي سربراهي ۾ 9 رڪني لارجر بينچ ڪيس جي ٻڌڻي ڪئي. جڊيشل اسسٽنٽ ۽ سپريم ڪورٽ جي اڳوڻي جج جسٽس (ر) منظور ملڪ دليل ڏيندي عدالت کي ٻڌايو ته گذريل ڏينهن هو شاهد مسعود محمود جي جرح بابت ڳالهائي رهيو هو، جنهن دوران جسٽس يحيٰ آفريدي اهم سوال اٿاريو، هڪ شاهد ٻڌايو ته ڊائريڪٽر . جنرل فيڊرل سڪيورٽي فورس (ڊي جي ايف ايس ايف) کي احمد رضا قصوري کي ڪليئر ڪرڻ جون هدايتون مليون، اهو بيان ڪيس جي قسم کڻندڙ شاهد جي بيان جي تضاد آهي، جنهن چيو هو ته مارڻ جون هدايتون وزيراعظم کان آيون هيون. جسٽس (ر) منظور ملڪ چيو ته ذوالفقار علي ڀٽي خلاف شاهدن جا بيان قانون جي نظر ۾ ڪا اهميت نٿا رکن، شاهد دعويٰ ڪئي ته الله تي سندس ايمان ٽٽڻ وارو ناهي، اهڙي وڏي دعويٰ الله ئي ڪري سگهي ٿو. الله جي تمام ويجهو آهي، هڪ شاهد چيو ته هن ڀٽو صاحب کي چيو ته خدا اسان سڀني کي پڄاڻيءَ تي پهچندو، شاهد چيو ته مون ڀٽو صاحب کي چيو ته مان هاڻي اهڙو حڪم نه مڃيندس، پوءِ ڇا وزيراعظم جي سامهون ڪو آفيسر اهڙي ڳالهه ڪري سگهي ٿو.
