قومي تحريڪ سنجيدگي گھري ٿي.اھو رواج وڌندي وڌندي فيشن بڻجي ويو آھي ته ڪنھن ھڪ واقعي کي بنياد بڻائي سنڌ جي سموري قومي تحريڪ ۽ قومپرست سياست خلاف پروپئگنڊا ڪئي وڃي ٿي. اھڙا ماڻھو خبر ناھي ڪھڙي ايجنڊا تي ڪم ڪري رھيا آھن. اھي سوچي سمجھي اھو عمل ڪري رھيا آھن يا اڻڄاڻائيءَ ۾ ڪنھن حڪمت عملي جو حصو بڻجي رھيا آھن؟
ان کان وڌيڪ سنڌ دشمن حڪمرانن لاءِ بھتر ٻي ڪا ڳالھه نٿي ٿي سگھي ته قومي تحريڪ کي بدنام ڪجي ۽ سنڌي عوام جو ان تان اعتماد ختم ڪيو وڃي. انساني زندگيءَ جي ھر ڪم ۽ ھر عمل وانگر قومي تحريڪ ۾ به ڪمي ڪوتاھي ۽ غلطي ٿي سگھي ٿي پر ان کي سڌارڻ جو طريقو ۽ رستو اھو آھي ته واسطيدار ڪردارن جي نشاندھي ڪري سياسي ٻوليءَ ۾ ان جو تجزيو ڪجي، ملن وانگر فتوا بازي نه ڪجي ۽ غداريءَ جا سرٽيفڪيٽ جاري نه ڪجن. ساڳئي وقت پروپئگنڊا ڪندڙ فرد/گروهه کي پنھنجي به سڃاڻپ ڪرائڻي پوندي ته اھو ڇا آھي ۽ ان پاڻ سنڌ جي قومي تحريڪ لاءِ ڪھڙو ڪردار ادا ڪيو آھي.
سنڌ ڪالونيلزم ۽ فيوڊلزم جي ٻٽي جبر ھيٺ گھاري رھي آھي. ان ۾ تڪليف ڏيندڙ واقعن جو امڪان سدائين موجود رھي ٿو. سنجيدگيءَ جي تقاضا آھي ته واقعن جي پويان قومي تحريڪ کي نه ڊوڙائجي پر قومي تحريڪ جي اجتماعي ڪردار ۽ دائري ۾ واقعن کي ڏسجي ۽ پرکجي.
