ممبئي ( ويب ڊيسڪ ) بالي ووڊ بادشاهه شاهه رخ خان لاءِ گذريل سال ڪاميابيون سان ڀرپور رهيو ۽ سندس ٽن فلمن پٺاڻ، جوان ۽ ڊنڪي باڪس آفيس تي بهترين ڪمائي سميت ڪيئي نوان رڪارڊ ٺاهيا.
پرڏيهي خابرو اداري موجب، اداڪار هاڻي هڪ انوکي ڪردار واري فلم ڪرڻ چاهي ٿو ۽ ان لاءِ سندس نامياري پرڊيوسرز وشال ڀردواج سان ڳالهه ٻول هلي رهي آهي.
وشال ڀردواج انڊسٽري ۾ مختلف ۽ انوکي انداز واريون فلمون ٺاهڻ سبب مشهور آهي هن اومڪارا، مقبول ۽ حيدر جهڙين شاندار فلمن جي هدايتڪاري ڪئي آهي.
ذريعن موجب، شاهه رخ خان پنهنجي مداحن کي سرپرائز ڏيڻ لاءِ وشال ڀردواج سان معاهدو ڪرڻ وارو آهي ۽ اِها امڪاني طور هڪ ٿرلر فلم هوندي.
ذريعن جو چوڻ آهي ته شاهه رخ خان کي وشال ڀردواج جي نئين فلم جو اسڪرپٽ وڻي ويو آهي ۽ هو تمام جلد باظابطا طور فلم ٺاهڻ جو اعلان ڪندو.
ياد رهي ته وشال ڀردواج ڪيئي ڀيرا شاهه رخ خان سان ڪم ڪرڻ جي خواهش جو اظهار ڪري چڪو آهي.
