والدين ۾ طلاق جا ٻارن تي ناڪاري اثر پئجي سگھن ٿا. اهو نوٽ ڪرڻ ضروري آهي ته سڀئي ٻار پنهنجي ذهني سطح ۽ عمر موجب اهڙين حالتن کي منهن ڏيڻ جي ڪوشش ڪندا آهن. ان کانسواءِ طلاق جا اثر مختلف عملن جي لحاظ سان مختلف ٿي سگھن ٿا جن ۾ ٻارن جي عمر، والدين وچ ۾ تڪرار جي سطح ۽ خارجي مدد جو انتظام وغيره شامل آهن. هيٺ طلاق جا اهي اثر بيان ڪيا پيا وڃن جن کي ٻار عام طور تي منهن ڏيندا آهن.
جذباتي تڪليف: ٻار والدين ۾ طلاق دوران ڪيترن ئي جذبن جو تجربو ڪري سگھن ٿا، جن ۾ اداسي، ڪاوڙ، الجهن ۽ مونجهارو شامل آهن. اهي پنهنجي زندگي ۾ وڏي نقصان يا رد ڪرڻ جو احساس به رکي سگھن ٿا، خاص طور تي ان وقت جڏهن والدين مان هڪ فرد گھر ڇڏي هليو وڃي.
طرز عمل ۾ تبديليون: ڪجهه ٻار رويي ۾ تبديليون ظاهر ڪندا آهن جهڙوڪ ڪم ۾ غير ذميواري ڪرڻ، سماجي سرگرمين کان پاڻ کي ڌار ڪري ڇڏڻ يا تعليمي ڪارڪردگي ۾ گھٽتائي ٿيڻ. اهو طرز عمل ٻار ۾ طلاق جي دٻاءَ ۽ ان بابت غير يقيني صورتحال کي منهن ڏيڻ جو هڪ طريقو هوندو آهي.
ذهني دٻاءُ: طلاق گھڻن ٻارن جي زندگي ۾ اضافي دٻاءُ جو سبب بڻبي آهي ڇو جو هنن کي زندگي جي نون انتظامن، معمولن ۽ امڪاني طورتي تبديل ٿيندڙ اسڪولن يا پاڙن ۽ نون ماڻهن ۾ ايڊجسٽ ڪرڻو پوندو آهي.
ڏوهه جو احساس ۽ ذميواري: ڪڏهن ڪڏهن ٻار والدين جيطلاق جو سبب پاڻ کي سمجهندا آهن، اهو سوچيندا آهن ته هو ڪنهن نه ڪنهن طرح سان ان جو سبب بڻيا آهن. اهو احساس خود اعتمادي ۾ گھٽتائي جو سبب بڻبو آهي.
نوان رشتا نڀائڻ ۾ ڏکيايون: ٻارن کي مستقبل ۾ صحتمند لاڳاپا رکڻ ۽ برقرار رکڻ ۾ جدوجهد ڪرڻي پوندي آهي، ڇو جو انهن کي ٻين تي ڀروسو ڪرڻ ۾ ڏکيائي يا رد ڪرڻ جو خوف هوندو آهي.
معاشي ڏکيايون: طلاق خاندان لاءِ مالي تبديلين جو به سبب بڻجي سگھي ٿي جيڪا ٻار جي زندگي جي معيار ۽ وسيلن تائين پهچ کي متاثر ڪندي آهي.
طلاق کان پوءِ والدين جو رويو: طلاق کان پوءِ به والدين وچ ۾ جاري تڪرار ٻارن تي ناڪاري اثر وجهندو آهي. ٻار پنهنجي والدين جي تڪرارن جي وچ ۾ پاڻ کي ڦاٿل محسوس ڪندا آهن ۽ فرار ٿيڻ جو ڪو نه ڪو رستو چاهيندا آهن.
عدم استحڪام: طلاق جو مطلب سدائين زندگي جي انتظامن ۾ تبديليون هوندو آهي ۽ ان جو اثر ٻارن جي ڀلائي ۾ عدم استحڪام ۽ انهن جي معمولن کي درهم برهم ڪري ڇڏيندو آهي. اهو ننڍي ٻار لاءِ خاص طور تي وڏو ڏکيو وقت هوندو آهي.
ڊگھا اثر: ڪجهه مطالعن مان خبر پوي ٿي ته طلاق جا نتيجا بالغ ٿيڻ تائين ٻار تي برقرار رهندا آهن جيڪي ٻار جي ذهني صحت، رشتن ۽ ايتري تائين جو بالغ ٿيڻ تي انهن جي به طلاق وٺڻ جي امڪانن ۾ اضافو ٿيندو آهي.
