پشاور(م ڊ) خيبر پختونخواهه جي وڏي وزير محمد سهيل آفريدي چيو آهي ته هو گورنر راڄ يا ايمرجنسي جي ڌمڪين جي ڪري پنهنجي موقف کان پوئتي نه هٽندو. پشاور ۾ امن امان بابت هڪ اجلاس کي خطاب ڪندي سهيل آفريدي چيو ته خيبر پختونخواهه جي عوام، پوليس ۽ فوج امن جي قيام لاءِ بيشمار قربانيون ڏنيون آهن، صوبي جي 80 هزار کان وڌيڪ ماڻهن پاڪستان لاءِ پنهنجون جانيون قربان ڪيون آهن. ٻن ڏهاڪن جي قربانين کان پوءِ حاصل ٿيندڙ امن ٻيهر بدامني جي نذر ٿي ويو آهي.وڏي وزير چيو ته جڏهن کان دهشتگرد جبلن تي پنهنجي آبادڪاري لاءِ ويا، رياست ۽ وفاق کي مسلسل خبردار ڪيو ويو، ۽ خيبر پختونخواهه جي مختلف ضلعن ۾ گڏجاڻيون، جلوس ۽ مظاهرا ڪري بدامني جي خلاف آواز بلند ڪيو ويو، جڏهن ته، وفاقي وزيرن پاران بار بار خبردار ڪرڻ کي پروپيگنڊا ۽ ڪوڙ قرار ڏنو ويو.هن چيو ته موجوده پاليسي غلط آهي ۽ نتيجي ۾ پختونن جو رت ٻيهر وهايو پيو وڃي، خيبر پختونخواه جي ماڻهن تي هڪ مخصوص ذهنيت جا تجربا ڪيا پيا وڃن. اڄ صوبي ۾ فوجي، پوليس اهلڪار، ٻار، عورتون، بزرگ ۽ عام شهري دهشتگردي جو نشانو بڻجي رهيا آهن. سهيل آفريدي چيو ته دادلن لاءِ هڪ پاليسي ۽ خيبر پختونخواه لاءِ ٻي پاليسي ڪم نٿي ڪري سگهي، انهن کان به سوال پڇڻ گهرجن جيڪي هندستان بابت رياستي بيانيي کي رد ڪن ٿا. خيبر پختونخواه کي ٻيهر دهشتگردي جي باهه ۾ اڇلائڻ جي پاليسي ناقابل قبول آهي. وڏي وزير چيو ته امن لاءِ ترقياتي بجيٽ مان 35 ارب رپيا ڪٽي پوليس کي ڏنا ويا، مالي سال 2026 ۾ پوليس جي صلاحيت وڌائڻ لاءِ وسيلا فراهم ڪيا ويا ۽ پوليس جي بجيٽ ۾ 103 سيڪڙو اضافو ڪيو ويو. پوليس فورس ۽ صلاحيت کي مضبوط ڪيو پيو وڃي، اسپيشل برانچ کي مضبوط ڪيو پيو وڃي ۽ پوليس کي جديد هٿيار ۽ ٻيو ضروري سامان فراهم ڪيو پيو وڃي. هن چيو ته صرف پوليس کي وسيلا فراهم ڪرڻ سان مسئلو حل نه ٿيندو، وفاق کي پاليسي تبديل ڪرڻي پوندي. هو 15 آڪٽوبر 2025 کان مسلسل چئي رهيو آهي ته 22 سالن کان هلندڙ پاليسي کي تبديل ڪيو وڃي ۽ خيبرپختونخواهه جي سڀني اسٽيڪ هولڊرز، حڪومت، انتظاميا ۽ پوليس کي اعتماد ۾ وٺي هڪ نئين پاليسي ٺاهي وڃي. سهيل آفريدي چيو ته جيڪڏهن سندس تجويز ڪيل نئين پاليسي تي عمل ڪيو وڃي ته 100 ڏينهن ۾ خيبرپختونخواهه ۾ امن آڻي سگهجي ٿو، پر ڪو به ٻڌڻ لاءِ تيار ناهي. ڪجهه ماڻهو بي خبر آهن ۽ خيبرپختونخواهه جي اسٽيڪ هولڊرز کي ٻڌڻ لاءِ تيار نه آهن.
