اسلام آباد(عوامي آواز نيوز)گڏيل قومن جي پاپوليشن فنڊ جو چوڻ آهي ته پاڪستان جي آبادي 25 ڪروڙ 72 لک ٿي چڪي آهي ۽ ملڪ جو مستقبل نوجوانن کي موقعا ڏيڻ تي منحصر آهي۔ عالمي آبادي جي ڏينهن جي موقعي تي گڏيل قومن جي پاپوليشن فنڊ هڪ نئين ۽ اهم رپورٽ جاري ڪئي آهي، جنهن ۾ نوجوانن کي ترقي جو مرڪز بڻائڻ جو پرزور مطالبو ڪيو ويو آهي۔ رپورٽ ۾ ٻڌايو ويو ته پاڪستان جي مجموعي آبادي هن وقت لڳ ڀڳ 25 ڪروڙ 72 لک ٿي چڪي آهي ۽ ملڪ جي هڪ ٽئين آبادي 10 کان 24 سالن جي وچ ۾ نوجوانن تي مشتمل آهي۔ اداري جو چوڻ آهي ته پاڪستان جو روشن مستقبل هاڻي مڪمل طور انهن نوجوانن کي ملندڙ موقعن، انهن جي فيصلن ۽ صلاحيتن تي ئي منحصر آهي۔ سروي موجب پاڪستان ۾ 76 سيڪڙو نوجوان پنهنجي مستقبل بابت تمام پراميد آهن، پر ٻي پاسي 53 سيڪڙو پاڪستاني نوجوان ملڪ جي موجوده سيڪيورٽي حالتن، معاشي مسئلن ۽ وڌندڙ عدم مساوات جي ڪري سخت پريشان به آهن۔ رپورٽ ۾ وڌيڪ چيو ويو آهي ته پاڪستان جي ديهي علائقن ۾ انٽرنيٽ جي سهولت کان محروم نوجوانن ۽ خاص طور ڇوڪرين کي پنهنجا خواب پورا ڪرڻ ۾ سخت مشڪلاتن کي منهن ڏيڻو پئجي رهيو آهي۔ انهيءَ ڪري عالمي اداري مطالبو ڪيو آهي ته نوجوانن کي جديد ڊجيٽل هنر سيکاريا وڃن ۽ انهن کي سٺيون نوڪريون مهيا ڪيون وڃن۔ ان سان گڏ گهٽ عمر جي شادين جو فوري خاتمو ۽ ڇوڪرين جي حقن جو تحفظ وقت جي سڀ کان اهم ضرورت آهي۔ گڏيل قومن جي پاپوليشن فنڊ جي نمائندي ڊاڪٽر لواءِ شبناي هن موقعي تي ڳالهائيندي چيو ته آبادي جي پاليسي صرف انگ وڌائڻ يا گهٽائڻ جو نالو ناهي، پر اهو بنيادي حقن ۽ چونڊ جو معاملو آهي۔ هن ان ڳالهه تي به خوشي جو اظهار ڪيو ته پاڪستان جي آبادي لاءِ جوڙيل ڪميٽي ۾ فيلڊ مارشل به شامل آهن۔
