اسلام آباد(بيورو رپورٽ) برطانيه ۾ پاڪستانين پاران ويزا جي غلط استعمال جو انڪشاف ٿيو آهي. تعليم حاصل ڪرڻ لاءِ ويل 10 هزار پاڪستانين اتي سياسي پناهه وٺي ڇڏي آهي. قومي اسيمبلي جي اسٽينڊنگ ڪميٽي جو اجلاس چيئرمين راجا خرم نواز جي صدارت هيٺ ٿيو. ڊي جي ايف آءِ اي عثمان انور ٻاهرين ملڪن ۾ رهندڙ پاڪستانين جي ملڪ بدري تي بريفنگ ڏيندي چيو ته يورپي يونين ۽ ٻين ملڪن غير قانوني طور تي ايندڙ پاڪستانين جو مسئلو اٿاريو آهي ۽ جيڪي غير قانوني طور تي ٻاهر وڃن ٿا اهي پاڪستان جي بدنامي ڪري رهيا آهن. ڊي جي ايف آءِ اي بريفنگ ڏيندي چيو ته هن سال وزٽ ويزا تي آذربائيجان ويل 7 هزار پاڪستاني واپس نه آيا، 580 پاڪستاني بيلاروس ويا ۽ واپس نه آيا. هن چيو ته برطانيه ۾ 10 هزار پاڪستانين شاگرد ويزا جو غلط استعمال ڪيو، 10 هزار پاڪستاني شاگرد ويزا تي ٻاهرين ملڪ ويا ۽ سياسي پناهه گهري، ۽ ملائيشيا ۽ ازبڪستان ذريعي انساني سمگلنگ جو هڪ نئون رستو به سامهون آيو آهي.هن چيو ته لبيا مان 175 پاڪستانين کي گرفتار ڪري واپس آندو ويو، منظم فقيرن ۾ 75 سيڪڙو گهٽتائي آئي، ۽ جعلي دستاويزن ۾ 31 سيڪڙو گهٽتائي آئي.
