جيڪب آباد(رياض سهيل)سڙيل ڀتيون، رک سان ڀريل گهر، ٽٽل کٽون، پکڙيل سامان ۽ ڀتين تي باهه جا ڪارا نشان سنڌ صوبي جو هڪ خاموش ڳوٺ، جتي ڪڏهن زندگي هئي، هاڻي رڳو خوف باقي آهي۔اهي منظر اتر سنڌ جي ضلعي جيڪب آباد جي ڳوٺ صديق آرائين جا آهن، جتي پسند جي شادي جي بدلي ۾ حملي آورن سڄو ڳوٺ ئي ساڙي ڇڏيو۔ انتقام جي هن باهه جو سلسلو ظاهري طور هڪ وڊيو بيان کان شروع ٿيو۔سنڌ اسيمبلي ۾ هن واقعي خلاف ٺهراءُ منظور ڪيو ويو آهي۔ سومر اجلاس دوران سنڌ جي گهرو وزير ضياءَ لنجار چيو ته جن ماڻهن جا گهر سڙيا آهن، انهن کي معاوضو ڏنو ويندو ۽ ان حوالي سان ڊپٽي ڪمشنر کان رپورٽ طلب ڪئي وئي آهي۔ ٺهراءَ جي متن ۾ مطالبو ڪيو ويو آهي ته متاثرن کي سيڪيورٽي فراهم ڪئي وڃي ۽ سمورن ملوث ماڻهن خلاف ڪارروائي ڪئي وڃي۔هي واقعو پنج مئي جو آهي۔ پر هن ڪهاڻي کي سمجهڻ لاءِ ڪجهه پوئتي وڃڻو پوندو، جڏهن ڪراچي ۾ تعليم هيٺ حسن ٻرڙو ۽ پنج درجا پڙهيل سدرا چنا حيدرآباد وڃي عدالت ۾ شادي ڪئي ۽ سوشل ميڊيا تي پنهنجي شادي بابت هڪ وڊيو پڻ جاري ڪئي۔سوشل ميڊيا تي موجود ان وڊيو ۾ سدرا چنا ۽ حسن بُرڙو گڏ ويٺل نظر اچن ٿا ۽ انهن جي هٿن ۾ حلف ناما هئا۔سدرا وڊيو بيان ۾ چيو ته مان پنهنجي مرضي سان آئي آهيان، اسان عدالت ۾ شادي ڪئي آهي۔ مان گهر مان رڳو هڪ وڳي ۾ نڪتي هيس۔ نه سون کنيم، نه پئسا۔“سدرا بيان ۾ اهو به دعويٰ ڪيو ته سندس عمر 14 سال نه پر 20 سال آهي۔ اها وڊيو وائرل ٿي وئي ۽ هن شادي جي مخالفن تائين به پهچي وئي۔وڊيو ۾ سدرا چنا ۽ حسن ٻرڙو جو چوڻ آهي ته سندن جان کي خطرو آهي۔نوجوان حسن ٻرڙو جي والد ملهار ٻرڙو جو چوڻ آهي ته انهن کي اهو به خبر نه هئي ته سندن پٽ جي سدرا سان دوستي ڪيئن ٿي ۽ ٻنهي ڪڏهن هتان نڪرڻ جو فيصلو ڪيو۔ سندس چوڻ موجب حسن جي چنا برادري جي نوجوانن سان دوستي هئي ۽ هو انهن وٽ ايندو ويندو هو،هن چيو ته اسان جي سردار مون کي فون ڪيو۔ مون چيو ته مون کي مهلت ڏيو، مان فون ڪريان ٿو۔ پر پٽ جو فون بند اچي رهيو هو۔ جيئن ئي سوشل ميڊيا تي وڊيو آئي ته سردارن جرڳو ڪيو ۽ ڳوٺ ساڙڻ جو فيصلو ڪيو۔ ڪيترائي سئو هٿياربند ماڻهو آيا، فائرنگ ڪئي، ماڻهن کي خوفزده ڪيو ۽ سڄي ڳوٺ کي باهه ڏئي ڇڏي۔“ايس ايس پي فيضان آرائين جو چوڻ آهي ته پوليس طرفان فوري ڪارروائي ڪئي وئي هئي۔ متاثرن جي فرياد تي 32 ماڻهن خلاف هنگامه آرائي جو ڪيس داخل ڪيو ويو، جڏهن ته 10 شڪي ماڻهن کي گرفتار به ڪيو ويو آهي۔پر متاثرن جو چوڻ آهي ته نه پوليس آئي، نه فائر برگيڊڳوٺ صديق آرائين ۾ داخل ٿيندي ئي هر طرف تباهي نظر اچي ٿي۔ ٻن درجن جي لڳ ڀڳ گهرن ۾ يا ته هر شيءِ سڙي چڪي آهي يا وري ٽوڙي وئي آهي۔پاڻي جي نلڪن کان وٺي گاهه ڪٽڻ وارين مشينن تائين، ڪجهه به محفوظ نه بچيو۔ ڪجهه اهڙا ماڻهو به حملي جو نشانو بڻيا، جن جو حسن ٻرڙو سان ڪو رشتو نه هو، پر اهي ساڳئي برادري سان تعلق رکندا هئا۔نجم الدين ٻرڙو ٻه وڏا صندوق کولي ڏيکاريا، جن ۾ رڳو ڪجهه ٿانوَ هئا، اهي به سڙيل۔ هن ٻڌايو ته انهن ۾ ٻن ڇوڪرين جو ڏاج رکيل هو۔ انهن صندوقن ۾ ڏاج جو سمورو سامان رکيل هو ۽ ڇوڪرين جي شادي جون تياريون هلي رهيون هيون،هن چيو ته حملي آور پاڻ سان گيس سلينڊر ۽ پيٽرول کڻي آيا هئا، سلينڊرن سان ڌماڪا ڪيا ويا، جنهن سبب ڇتيون اڏامي ويون۔ هو ڪجهه سامان ڦري کڻي ويا ۽ باقي ساڙي ڇڏيو۔نجم الدين الزام لڳائيندي چوي ٿو: ”نه پوليس آئي ۽ نه ئي فائر برگيڊ۔ انهن کي به سردارن پنهنجي سياسي اثر رسوخ ذريعي روڪي ڇڏيو هو،صديق آرائين جا گهڻا رهواسي مزدور آهن۔ هن وقت ڳوٺ ۾ رڳو مرد موجود آهن۔ عورتون حملي کان اڳ ئي هتان نڪري ويون هيون۔سدرا جي والد رفيق چنا بي بي سي کي ٻڌايو ته رات جي اوندهه ۾ منهنجي ڌيءَ کي اغوا ڪيو ويوجڏهن ته ڳوٺ ۾ موجود پرائمري اسڪول جي عارضي عمارت به هن حملي جي باهه کان محفوظ نه رهي، ان کي به ساڙي ڇڏيو ويو۔ هاڻي ڳوٺ جا ٻار هڪ ويٺڪ ۾ تعليم حاصل ڪري رهيا آهن۔ استادن بي بي سي کي ٻڌايو ته انهن لاءِ ڊيسڪ به ڀرپاسي وارن اسڪولن کان گهرايا ويا آهن۔سردار احمد علي چنا تسليم ڪري ٿو ته مڇريل ماڻهن صديق آرائين ڳوٺ تي حملو ڪيو، پر سندس موقف آهي ته نقصان پاڻ ڳوٺ وارن ڪيو،جنهن وقت حملو ٿيو، مان ٿاڻي تي ايف آءِ آر داخل ڪرائي رهيو هوس۔“چنا برادري جي سردارن جو چوڻ آهي ته ڇوڪري کي انهن حوالي ڪيو وڃي۔ ”ڇوڪري جيڪو بيان ڏيندي، ان جي روشني ۾ فيصلو ٿيندو۔“انهن اهو به واضح ڪيو ته هو حل ”جرڳي ذريعي“ چاهين ٿا، جڏهن ته حسن ٻرڙو جي خاندان جو چوڻ آهي ته ”هاڻي فيصلو صرف عدالت ئي ڪندي۔“هڪ سوال اهو به اٿاريو پيو وڃي ته ميرپور ٿاڻو هتان رڳو ٻه ڪلوميٽر پري هو، پوءِ پوليس هن هنگامه آرائي کي روڪڻ جي ڪوشش ڇو نه ڪئي؟ضلعي انتظاميا موجب هن حملي ۾ 68 خاندان متاثر ٿيا آهن، ۽ اڳوڻي چيئرمين سينيٽ محمد ميان سومرو طرفان ڪجهه خيما فراهم ڪيا ويا آهن، جڏهن ته حڪومت پنج، پنج ڪلو راشن جا ٿيلها فراهم ڪيا آهن۔پر مقامي ماڻهو اڃا تائين غير يقيني واري صورتحال ۾ آهن۔
