ڪراچي(پ ر) جماعت اسلامي پاڪستان جي امير حافظ نعيم الرحمان چيو آهي ته سنڌ ۾ بدامني، ڌاڙيل راڄ، تعليم جي تباهي حڪومتي نااهلي آهي. پيپلز پارٽي گذريل 17 سالن کان اقتدار ۾ آهي، پر سنڌ جا ماڻهو پيئڻ جي صاف پاڻي سميت زندگي جي بنيادي سهولتن کان محروم آهن، جيڪا ڳڻتي جوڳي حالت آهي. جماعت اسلامي هر فورم تي نظام جي تبديلي ۽ عوام جي حقن جي جنگ وڙهي رهي آهي. اهڙن خيالن جو اظھار ھن صوبائي اطلاعات سيڪريٽري مجاهد چنا جي اڳواڻي ۾ لاهور ۾ منصوره مرڪز ۾ ميڊيا ورڪشاپ جي موقعي تي هڪ وفد سان ملاقات دوران ڳالهائيندي ڪيو. هن وڌيڪ چيو ته پاڪستان صرف شھباز شريف يا جنرل عاصم منير جو نالو ناهي، پر هڪ نظريي ۽ سوچ جو نالو آهي. لکين قربانين کان پوءِ پاڪستان اسلام ۽ ڪلمي جي نالي تي وجود ۾ آيو. پر پاڪستان جي قيام کان وٺي، حڪمران قيادت وياجي معيشت ذريعي الله ۽ سندس رسول جي خلاف جنگ ڪئي آهي هن چيو ته انهن حڪمرانن جي ڪري اسان جي ملڪ جو قرض 85 هزار ارب رپين تائين پهچي ويو آهي ۽ ان ۾ روزانو 20 ارب رپين جو وڌارو ٿي رھيو آهي،هن چيو ته سوشل ميڊيا جا سڀئي پليٽ فارم ڪنهن به انقلابي تبديلي لاءِ هڪ بهترين هٿيار آهن.
