حيدرآباد رپورٽر+عوامي آواز نيوز) جونيئر ذوالفقار علي ڀٽو ڪالھ قاسم آباد ۾ پارٽي جي شھيد اڳواڻ ڪاشف باغي جي وارثن ۽ جونيئر ذوالفقار علي ڀٽو ٽيم ضلعي حيدرآباد جي اڳواڻ ارشاد خاصخيلي سان سندس امڙ جي وفات تي تعزيت ڪرڻ لاءِ سندس گھر پھتو. قاسم آباد ۾ شھيد ڪاشف باغي جي ڀاءُ آصف قائمخاني ۽ ٻين وارثن سان تعزيت ڪئي. ان موقعي تي ھن صحافين سان ڳالھائيندي چيو ته شھيد ڪاشف باغي اسان جو دلير اڳواڻ ھو. جنھن کي شھيد ڪيو ويو پر افسوس اڃا تائين ان جا قاتل گرفتار نه ڪيا ويا آھن. ھن ھڪ سوال جي جواب ۾ چيو ته سنڌ اندر جيڪڏھن ڪابه متبادل سياسي راھ هموار ٿي رھي آھي يا ڪو اتحاد ٺھي رھيو آھي ته ڀلي ٺھي پر ھو ڪنھن به اتحاد ۾ شموليت نه ڪندو. ٻئي پاسي جونيئر ذوالفقار علي ڀٽو چيو آهي ته سڀ کان پهرين، مان ايترو منافق ناهيان جو هڪ ڏينهن ڪنهن کي قاتل چوان ۽ ٻئي ڏينهن وڃي ان سان شامل ٿي وڃان. اسان جي اسلام ۾ به اهو چيو ويو آهي ته هڪ ئي گهر اندر دشمني پيدا نه ٿيڻ گهرجي. جيڪڏهن خانداني سطح تي صلح يا لاڳاپو هجي، ڀلي اهو امير بخش ۽ بلاول سان هجي يا ڪنهن ٻئي سان، ان ۾ ڪو مسئلو ناهي. خانداني صلح پنهنجي جاءِ تي، پر سياسي اختلاف پنهنجي جاءِ تي رهندا،هن چيو ته پير پاڳارو اسان جي والد جو ويجهو دوست رهيو آهي، ۽ اسان کيس سپورٽ ڪريون ٿا. چونڊن جي وقت جيڪڏهن اتحاد ٺهي وڃي ته ان ۾ به ڪو مسئلو ناهي، پر اسان ڪنهن سان باقاعده شامل نه ٿينداسين.چونڊ وڙهڻ لاءِ وڏي محنت گهربل هوندي آهي. اسان وٽ شايد اهي وسيلا ناهن جيڪي پاڪستان پيپلز پارٽي وٽ آهن، پر اسان وٽ ماڻهو آهن، محنتي ماڻهو آهن، ماڻهن جي طاقت آهي. جيڪڏهن اسان ان کي صحيح نموني استعمال ڪري سگهنداسين ته انشاءَالله چونڊ وڙهنداسين. جيڪڏهن هن وقت تيار نه هونداسين ته اڳتي به چونڊون اينديون،هن چيو ته اسان سڀ کان پهرين انسانن کي بچائڻ چاهيون ٿا. هن وقت قتل ٿي رهيا آهن، خاص طور تي عورتن جا قتل ٿي رهيا آهن. هن چيو ته اسان پاڻ ۾ اهو فيصلو ڪيو آهي ته في الحال سياسي پارٽي نه ٺاهينداسين. ان جي بدران، “ٽيم ذوالفقار” جو نالو تبديل ڪري “ذيب رابطا ڪميٽي” رکيو ويو آهي، جيڪا ذوالفقار علي ڀٽو جي نالي سان منسوب هڪ تنظيم آهي. اهو به پارٽي ڏانهن هڪ قدم آهي هن چيو ته جيستائين فنڪشنل ليگ ۽ سنڌ حڪومت خلاف ٺهندڙ اتحاد جو سوال آهي، مان واضح طور تي چوڻ چاهيان ٿو ته مان ڪنهن سان شامل نه ٿيندس. مان پنهنجي پارٽي جو پاڻ اڳواڻ بڻجندس، ڀلي اها شهيد ڀٽو جي نالي سان هجي يا ڪنهن ٻي نالي سان.ها، پير پاڳارا سان اسان جا لاڳاپا آهن، ۽ چونڊن وقت اتحاد ٿي سگهي ٿو، پر اسان ڪنهن به پارٽي ۾ شامل نه ٿينداسين.
