جڳ مشهور عالمي مئگزين ”ٽائم“ طرفان دنيا جي 100 بااثر ترين شخصيتن جي تازي فهرست جاري ڪئي وئي آهي، جنهن ۾ ڪيئي اهم تبديليون سامهون آيون آهن، حيرت جوڳي ڳالهه اِها آهي ته هن سال جي فهرست ۾ ڀارتي وزيراعظم نريندر مودي جو نالو شامل ناهي، جڏهن ته ڀارتي اداڪار رنبير ڪپور پنهنجي جاءِ ٺاهڻ ۾ ڪامياب ويو آهي.
ڀارت مان ٻين نمايان شخصيتن ۾ گوگل جو سي اي او سندر پچائي ۽ مشهور شيف وڪاس کنا پڻ شامل آهن.
سندر پچائي کي هٿرادو ڏاهپ واري ٽيڪنالوجي (اَي آءِ) جي شعبي ۾ عالمي اڳڀرائي ۽ وڪاس کنا کي انسانيت جي خدمت ۽ کاڌي ذريعي قومن ۾ ويڇا گهٽائڻ تي فهرست جو حصو بڻايو ويو آهي.
سياستدانن ۾ هن ڀيري ڏکڻ ايشيا مان نيپال جو نوجوان وزيراعظم باليندر شاهه (بالن) ۽ بنگلاديش جو نئون وزيراعظم طارق رحمان بااثر ماڻهن ۾ شامل آهن.
طارق رحمان 17 سالن جي جلاوطني کانپوءِ چونڊن ۾ سوڀ ماڻي اقتدار ۾ آيو آهي، جڏهن ته باليندر شاهه نوجوانن جي حمايت سان نيپال جو ننڍي عمر وارو وزيراعظم بڻيو آهي.
ٻئي پاسي ڪو به پاڪستاني ان فهرست ۾ جاءِ ناهي ٺاهي سگهيو.
ميگزين جي تازي فهرست مان ظاهر ٿئي ٿو ته هاڻي دنيا ۾ اثر رسوخ جي تعريف بدلجي رهي آهي، جتي روايتي سياستدانن جي ڀيٽ ۾ ٽيڪنالاجي، فن ۽ سماجي تبديلي آڻيندڙ اڳواڻ وڌيڪ نمايان ٿي رهيا آهن.
