ڪراچي(ويب ڊيسڪ) سنڌ حڪومت بچت پاليسي لاڳو ڪندي دڪانن ۽ شاپنگ مالز رات جلد بند ڪرڻ جو اعلان ڪري ڇڏيو.
سنڌ حڪومت طرفان جاري ڪيل نوٽيفڪيشن موجب مارڪيٽن، هوٽلن ۽ شادي هالن لاءِ نئون شيڊيول لاڳو ڪيو ويو آهي.
نوٽيفڪيشن موجب، ڪراچي سميت ٻين ڊويزنل هيڊڪوارٽرز کانسواءِ سمورين ضلعن ۾ دڪان، مارڪيٽون ۽ شاپنگ مالز رات 8هين وڳي بند ڪيا ويندا جڏهن ته ڊويزنل هيڊڪوارٽرز ۾ دڪان، مارڪيٽون ۽ شاپنگ مالز رات 9 وڳي بند ٿيندا.
ان کانسواءِ هوٽلن ۽ فوڊ آئوٽ ليٽس کي شام 7 کان رات ساڍي يارهين وڳي تائين کولڻ جي اجازت هوندي جڏهن ته هوم ڊليوري ۽ ٽيڪ اوي سروس تي ڪا پابندي لاڳو نه هوندي.
نوٽيفڪيشن موجب، شادي هالن ۽ بينڪوئٽس کي رات 8هين کان 12هين وڳي تائين تقريبن جي اجازت هوندي.
نوٽيفڪيشن ۾ ڄاڻايو ويو آهي ته تندور، ملڪ شاپس، بيڪريون، ميڊيڪل اسٽورز، ليبارٽريون، ڪلينڪس، اسپتالون ۽ پيٽرول پمپس پابندين کان آجا هوندا.
نوٽيفڪيشن موجب، بچت پاليسي بابت هدايتون فوري طور لاڳو هونديون.
سنڌ حڪومت ڪمشنرز ۽ ڊپٽي ڪمشنرز کي هدايت ڪئي آهي ته اهي سنڌ پوليس جي سهڪار سان انهن حڪمن تي سختي سان عملدرآمد کي يقيني بڻائين.
ياد رهي ته وفاقي حڪومت جي بچت پاليسي موجب، پنجاب ۽ بلوچستان جون حڪومتون اڳ ئي مارڪيٽون رات 8 وڳي بند ڪرڻ جا حڪم جاري ڪري چڪيون آهن.
