اسلام آباد (ويب ڊيسڪ) اسلام آباد ۾ آمريڪي ۽ ايراني وفدن جي آمد جو انتظار ڪيو پيو وڃي، جڏهن ته شهر ۾ سيڪيورٽي وڌيڪ سخت ڪئي وئي آهي.
اسلام آباد پوليس جي ترجمان موجب، اميد آهي ته وفد جلد پهچي ويندا، پر هن واضح نه ڪيو ته ڪهڙو وفد ڪڏهن پهچندو.
اسلام آباد جي ريڊ زون، جتي اڪثر سرڪاري عمارتون ۽ پرڏيهي سفارتخانا موجود آهن، کي ڪنڊيدار تار لڳائي بند ڪيو ويو آهي. شهر ۾ چيڪ پوسٽن جو انگ وڌايو ويو ۽ روڊن تي ٽريفڪ معمول کان گهٽ آهي.
پوليس، فوج ۽ نيم فوجي دستا سيڪيورٽي لاءِ مقرر ڪيا ويا آهن، جڏهن ته عالمي صحافي پڻ شهر پهچي رهيا آهن.
اڃا تائين ان ڳالهه جي ڪا به سرڪاري تصديق ناهي ٿي ته ٻنهي مان ڪو به وفد اسلام آباد پهتو آهي.
گذريل ڏينهن پاڪستان ۾ ايراني سفير هڪ پوسٽ ۾ چيو هو ته سندن وفد رات جو پهچندو، پر هڪ ڪلاڪ اندر اها پوسٽ ڊليٽ ڪئي وئي هئي.
پاڪستان طرفان به ڳالهين جو ڪو باظابطا شيڊيول جاري ناهي ڪيو ويو، جڏهن ته وائيٽ هائوس اڳ ئي چئي چڪو آهي ته ڳالهيون ڇنڇر جي صبح ٿينديون.
