ڪراچي (رپورٽر ) سنڌ جي وڏي وزير سيد مراد علي شاهه هڪ اعليٰ سطحي اجلاس جي صدارت ڪندي ٻارڻ (فيول) تي ٽارگيٽيڊ سبسڊي پروگرام شروع ڪرڻ لاءِ طريقي ڪار ۽ عملدرآمد جي حڪمت عملي جوڙي ورتي آهي جنهن جو مقصد عالمي سطح تي ٻارڻ جي قيمتن ۾ تيزيءَ سان ٿيندڙ اضافي کان شهرين کي بچائڻ آهي جڏهن ته پبلڪ ٽرانسپورٽ جي ڪرائي کي پهچ ۾ رکڻ ۽ صوبي جي ٽرانزٽ سسٽم کي رواني سان هلائڻ کي يقيني بڻائڻ آهي. وزيراعليٰ هائوس ۾ ٿيندڙ اجلاس جنهن ۾ صوبائي وزيرن شرجيل انعام ميمڻ، مڪيش ڪمار چاولا، محمد بخش خان مهر، چيف سيڪريٽري آصف حيدر شاهه، وڏي وزير جو پرنسپل سيڪريٽري آغا واصف، ۽ صوبائي سيڪريٽريز آصف اڪرام، فياض جتوئي (ناڻو)، سليم راجپوت (ايڪسائيز)، اسد ضامن (ٽرانسپورٽ)، سي اي او ايس پي ايڇ ايف خالد شيخ ۽ ٻين شرڪت ڪئي ان ۾ سستي ٽرانسپورٽ ڀاڙي کي برقرار رکڻ ۽ صوبي جي ٽرانزٽ نيٽ ورڪ جي آپريشنل استحڪام کي يقيني بڻائڻ تي ڌيان ڏنو ويو. وڏي وزير چيو ته هي قدم تازو عالمي جيو پوليٽيڪل صورتحال جي نتيجي ۾ پيٽرول ۽ ڊيزل جي قيمتن ۾ ٿيندڙ بي مثال واڌ جي اثر کي گهٽائڻ لاءِ تيار ڪيو ويو آهي. وڏي وزير چيو ته گذريل ڪجهه هفتن ۾ ٻارڻ جي قيمتن ۾ نمايان اضافو ٿيو آهي جنهن سان ڪرائي ۾ واڌ ۽ پبلڪ ٽرانسپورٽ جي استعمال ۾ گهٽتائي جو سنگين خطرو پيدا ٿيو آهي جيڪو خاص طور تي گهٽ آمدني وارن طبقن کي متاثر ڪري رهيو آهي. ان کي روڪڻ لاءِ حڪومت "ٽارگيٽيڊ پيپلز فيول ڊفرنشل سبسڊي” متعارف ڪرائي آهي جيڪا بحران کان اڳ واري ۽ موجوده ٻارڻ جي قيمتن جي وچ ۾ فرق کي ختم ڪندي. وڏي وزير چيو ته هي پروگرام معاشي استحڪام کي برقرار رکڻ سان گڏ سماج جي سڀ کان وڌيڪ متاثر طبقن کي تحفظ ڏيڻ تي آهي، هن وڌيڪ چيو ته عام سبسڊيز غير موثر ۽ مالي طور تي ناقابل برداشت ثابت ٿيون هيون. هن پيڪيج تحت ٽرانسپورٽ آپريٽرز کي ان شرط تي وڏي مالي سبسڊي فراهم ڪئي ويندي ته هو ڪرائي ۾ اضافو نه ڪندا. بسون، مني بسن ۽ ڪوچن کي 2,40,000 رپيا في گاڏي ماهوار (وفاقي ۽ صوبائي حصو شامل آهي). ويگنن ۽ پڪ اپ کي 50,000 کان 1,00,000 رپيا ماهوار. ننڍن ٽرڪن لاءِ 70,000 رپيا ۽ وڏن ٽرڪن لاءِ 80,000 رپيا. انٽر شهر ٽرانسپورٽ لاءِ سبسڊي روٽ جي فاصلي جي بنياد تي سليبس ۾ ورهايل آهي جتي ڊگهي فاصلي واري بسون 1.08 ملين رپيا ماهوار تائين سبسڊي جون اهل هونديون ته جيئن پوري صوبي ۾ ڪرائي ۾ استحڪام کي يقيني بڻائي سگهجي. عوامي رليف جي هڪ وڏي قدم طور سنڌ حڪومت اپريل ۾ هر رجسٽرڊ موٽرسائيڪل مالڪ کي 2,000 رپيا روڪ رقم فراهم ڪندي. سبسڊي هڪ ڊجيٽل، ايپليڪيشن تي ٻڌل سسٽم ذريعي فراهم ڪئي ويندي جيڪا ايڪسائيز ۽ ٽرانسپورٽ کاتي جي ڊيٽابيس سان ڳنڍيل هوندي. هي سسٽم فنڊ سڌو سنئون بينڪ اڪائونٽس ۾ منتقل ڪرڻ کان اڳ گاڏي جي رجسٽريشن، فٽنيس، ۽ مالڪي جي تصديق ڪندو. وڏي وزير ايڪسائيز کاتي کي هدايت ڪئي ته ايندڙ 15 ڏينهن تائين آفيسون وڌيڪ وقت تائين کليل رکيون وڃن ته جيئن رجسٽريشن ۾ آساني ٿئي. سبسڊي پروگرام جنهن جي لڳ ڀڳ ماهوار لاڳت 1.72 ارب رپيا هوندي، هڪ اهڙي ٽرانسپورٽ نيٽ ورڪ جي مدد ڪندو جيڪو ماهوار تقريباً 57 ملين رپيا مسافرن کي سهولت فراهم ڪري ٿو، جنهن سان ڪرائي ۾ استحڪام ايندو ۽ نجي گاڏين جي استعمال ڏانهن وڌندڙ لاڙي جي حوصلا شڪني ٿيندي. پنهنجي حڪومت جي عزم کي ورجائيندي مراد علي شاهه چيو ته اسان يقيني بڻائينداسين ته رليف شفاف ۽ وقتائتي نموني ماڻهن تائين پهچي. هي ٽارگيٽيڊ طريقو انهن ڏکين حالتن ۾ مسافرن ۽ ٽرانسپورٽ شعبي ٻنهي جي حفاظت ڪندو.
