ڪراچي (رپورٽر) سنڌ اسيمبلي جي اڳوڻي اسپيڪر مرحوم آغا سراج دراني کي وفات کان پنج مهينا پوءِ غيرقانوني اثاثن واري ريفرنس مان بيگناهه قرار ڏنو ويو آهي. نيب ڪورٽ ڪراچي ۾ 2019ع کان هلندڙ ريفرنس واپس وٺڻ لاءِ چيئرمين نيب پاران اسپيشل پبلڪ پراسيڪيوٽر منظور شاهه وسيلي درخواست داخل ڪرائي وئي آهي جنهن ۾ موقف اختيار ڪيو ويو آهي ته هاڻي هي ريفرنس نٿو ٺهي، ان ڪري کيس واپس وٺڻ چاهيون ٿا. نيب طرفان آغا سراج دراني، سندس گهر ڀاتين، ملازمن ۽ فرنٽ مين خلاف اثاثن جو ريفرنس داخل ڪيو ويو هو جنهن ۾ مٿن فردِ جرم پڻ لاڳو ٿي چڪي هئي. جوابدارن تي مجموعي طور هڪ ارب 61 ڪروڙ 6 لک 69 هزار 528 رپين جا غيرقانوني اثاثا ٺاهڻ جو الزام هو. عدالت نيب جي درخواست تي ڪيس جي ٻين جوابدارن صنم دراني، شمشاد خاتون، سلميٰ ارشاد ۽ سيد محمد شاهه کي طلب ڪري ورتو آهي. نيب ڪورٽ حڪم ڏنو آهي ته حراست ۾ موجود جوابدار کي ايندڙ ٻڌڻي تي عدالت ۾ پيش ڪيو وڃي ته جيئن ڪيس کي منطقي انجام تائين پهچائي سگهجي.
