واشنگٽن(عوامي آواز نيوز)ايران جنگ جي معاملي تي استعيفيٰ ڏيندڙ آمريڪي دهشتگردي ٽوڙ سينٽر جي اڳوڻي ڊائريڪٽر جو ڪينٽ چيو آهي ته علي خامنه اي کي نشانو نه بڻائڻ گهرجي ها۔هن سياسي مبصر ٽڪر ڪارلسن کي ڏنل انٽرويو ۾ چيو ته ايران جي رهبرِ اعليٰ کي مارڻ لاءِ آمريڪا ۽ اسرائيل جو گڏيل آپريشن “ڪڏهن به نه ڪرڻ گهرجي ها”۔جو ڪينٽ موجب خامنه اي دراصل ايران جي جوهري پروگرام جي نگراني ڪري رهيو هو ۽ انهن کي جوهري هٿيار حاصل ڪرڻ کان روڪي رهيو هو۔ هن چيو ته جيڪڏهن اهڙي قيادت کي هٽايو وڃي يا قتل ڪيو وڃي ته ان سان عوام ۽ نظام وڌيڪ متحد ٿي سگهي ٿو۔هن اهو به چيو ته موجود معلومات مطابق ايران جوهري بم ٺاهڻ جي ويجهو نه هو، نه ئي 2025 جي وچ ۾ اهڙي صورتحال هئي۔ هن ايران جي 2004 واري فتويٰ جو به ذڪر ڪيو، جنهن موجب جوهري هٿيار ٺاهڻ منع آهي، ۽ سندس چوڻ هو ته ڪا به انٽيليجنس اهڙي خلاف ورزي ڏيکاريندي نه ملي۔جو ڪينٽ پنهنجي استعيفيٰ ۾ چيو هو ته هو پنهنجي ضمير خلاف وڃي هن جنگ جي حمايت نٿو ڪري سگهي، ۽ سندس خيال ۾ ايران خلاف ڪارروائي جو فيصلو بنيادي طور اسرائيل جي اثر هيٺ ٿيو۔هن وڌيڪ خبردار ڪيو ته اهڙين ڪاررواين سان ايران اندر ردعمل وڌي سگهي ٿو ۽ عوام ۽ نظام وڌيڪ مضبوط ٿي سگهن ٿا، جنهن جو نتيجو اڳ ۾ ئي ڏسڻ ۾ اچي رهيو آهي۔ٻئي پاسي رپورٽن موجب سندس بيانن ۽ استعيفيٰ کان پوءِ سندس خلاف خفيه معلومات ليڪ ٿيڻ بابت جاچ به شروع ڪئي وئي آهي، جيڪا اڳ ۾ ئي سندس استعيفيٰ کان اڳ شروع ٿي چڪي هئي۔
