تل ابيب (ويب ڊيسڪ) اسرائيلي بچاءَ واري وزير يسرائيل ڪاتز دعويٰ ڪئي آهي ته حزب الله جي سربراهه نعيم قاسم اسرائيلي حملي جو نشانو بڻايو ويو آهي.
هڪ بيان ۾ هن وڌيڪ چيو ته وزيراعظم بنيامين نيتن ياهو ۽ مون اسرائيلي فوج کي حزب الله خلاف طاقت سان ڪارروائي ڪرڻ جي هدايت ڪئي آهي.
ان کان اڳ اسرائيلي ڊفنيس فورسز جو چوڻ هو ته انهن بيروت ۾ حزب الله جي هڪ اڳواڻ کي نهايت درستگي سان نشانو بڻايو آهي.
پرڏيهي ميڊيا رپورٽن موجب، آءِ ڊي ايف بيروت سميت لبنان جي مختلف علائقن ۾ حزب الله جي ٺڪاڻن تي حملا ڪيا آهن.
لبنان ۾ زميني ڪارروائي سميت سڀئي آپشنز غور هيٺ: اسرائيلي فوج
اسرائيلي فوج جي ترجمان بيروت ۽ اتر سرحد تي تازن چڪرين کانپوءِ صحافين کي بريفنگ ڏيندي چيو آهي ته لبنان ۾ زميني ڪارروائي بابت سمورا آپشنز غور هيٺ آهن.
هن چيو ته حزب الله اسرائيل تي حملي جي ڳري قيمت ادا ڪندي ۽ اسان مڪمل طور تي تيار آهيون.
ترجمان موجب، اٽڪل هڪ لک ريزرو فوجي، درجنين بٽالين، بريگيڊ ۽ ڊويزنز اتر سرحد جي دفاع لاءِ متحرڪ ڪيا ويا آهن ۽ فوج هر ممڪن صورتحال لاءِ تيار آهي.
