شڪار پور (رپورٽ: زاھد سنجراڻي) خانپور لڳ مسافر وين جو موٽر سائيڪل کي ٽڪر لڳڻ سبب چاچو ۽ ڀائيٽو فوت ٿي ويا جڏهن ته هڪ زخمي ٿي پيو. خانپور ٿاڻي جي حد انڊس هاءِ وي منگي لاڙو ڀرسان حادثو پيش آيو. حادثي ۾ فيضو لاڙو ڀرسان ڳوٺ ريڊيو سردار پور واسي پورهيت نثار احمد پٽ محمد نھال لاشاري ۽ سندس ڀائيٽو مختيار احمد پٽ عبدالڪريم لاشاري موقعي تي ئي فوت ٿي ويا جڏهن ته علي حسن پٽ عبدالڪريم لاشاري زخمي ٿي پيو. زخمي کي نازڪ حالت ۾ سکر نيو ويو جنھن جي حالت ڳڻتي جوڳي ٻڌائي پئي وڃي. پوليس فوتين جا لاش خانپور اسپتال کڻائي وئي جڏهن ته ويگن ڊرائيور فرار ٿي ويو ۽ ويگن کي تحويل ۾ ورتو ويو.
