اسلام آباد(م ڊ)سينيئر صحافي نصرت جاويد هڪ ٽي وي پروگرام ۾ گفتگو دوران انڪشاف ڪيو آهي ته وفاقي حڪومت نيشل فنانس ايوارڊ جي ان فارمولِي کان مطمئن ناهي جيڪو يوسف رضا گيلاني جي دورِ حڪومت ۾ طئي ٿيو هو۔ هن جي مطابق وزيراعظم جي آفيس ۾ اهڙا فرد سرگرم آهن جيڪي بظاهر ماهر طور پيش ڪيا وڃن ٿا پر حقيقت ۾ رڳو ڳالهائيندڙ آهن ۽ انگريزي مضمونن جي ذريعي راءِ عامه کي متاثر ڪرڻ جي ڪوشش ڪن ٿا۔ هن خبردار ڪيو ته جلد ئي انگريزي اخبارن ۾ اهڙا مضمون شايع ٿيندا جن ۾ موجوده فارمولِي کي درست ۽ ملڪ لاءِ موزون قرار ڏنو ويندو. نصرت جاويد هن خدشي جو به اظهار ڪيو ته پيپلز پارٽي ۽ بلاول ڀٽو زرداري جي بيانن کي ڪمزور ڪرڻ لاءِ پردي پٺيان تياري ڪئي پئي وڃي ته جيئن انهن جي موقف کي عوامي سطح تي غير مؤثر بڻايو وڃي۔ هن واضح ڪيو ته هن بحث کي ڪنهن به صورت پنجاب ۽ سنڌ جي وچ ۾ تڪرار جي شڪل نه ڏني وڃي ڇاڪاڻتہ ان سان صوبي سطح تي ڇڪتاڻ پيدا ٿي سگهي ٿي۔ هن جو چوڻ هو ته قومي مالي ايوارڊ جي تحت وفاق ۽ صوبن جي وچ ۾ وسيلن جي ورهاست ٻيهر وڏي بحث جو مرڪز بڻجڻ پئي وڃي۔ هي مسئلو رڳو ٻوڏ متاثرن جي بحالي تائين محدود ناهي پر ان جي پٺيان گهرا اقتصادي ۽ سياسي عنصر ڪارفرما آهن۔ هن جي مطابق وفاق کي اهو احساس آهي ته موجوده اين ايف سي ايوارڊ تحت وسيلن جي ورهاست ان لاءِ نقصانڪار ثابت ٿي رهي آهي، انهيءَ ڪري امڪان آهي ته نون ليگ جلد هڪ منظم مهم شروع ڪندي جنهن ۾ وڏي احتياط سان اهو موقف اجاگر ڪيو ويندو ته نيشل فنانس ايوارڊ اصل ۾ هڪ "وڏو بلنڊر” هو۔ هن وڌيڪ چيو ته نون ليگ اهو بيانيو اختيار ڪرڻ جي تياري ڪري رهي آهي ته يوسف رضا گيلاني جي دور ۾ پيپلز پارٽي جيڪا ورهاست ڪئي هئي اها معاشي لحاظ سان هڪ غلط فيصلو هو، تنهنڪري هن فارمولِي کي بدلائڻ جي ضرورت آهي۔ نصرت جاويد وڌيڪ چيو ته پيپلز پارٽي هن صورتحال جي آھٽ محسوس ڪندي اڳ ئي ممڪن ردعمل لاءِ تيار ٿي رهي آهي ته جيئن پنهنجي موقف جو دفاع ڪري سگهي۔
