لاهور/ملتان (بيورو/ م ڊ) ڀارت طرفان پاڪستان کي ٻوڏ بابت نئين ڄاڻ فراهم ڪرڻ کانپوءِ پنجاب ۾ مٿانهين درجي جي ٻوڏ جو الرٽ جاري ڪيو ويو آهي، جڏهن ته جلال پور ۽ پيروالا ۾ ٻوڏ سبب صورتحال خراب ٿيڻ کانپوءِ پاڪ فوج کي طلب ڪيو ويو آهي. پي ڊي ايم اي پنجاب موجب ڀارتي هاءِ ڪميشن پاڪستان کي ٻوڏ صورتحال تي ڄاڻ فراهم ڪئي آهي، جنهن موجب ستلج درياهه ۾ پاڻي جي وهڪري ۾ وڌيڪ واڌ ٿيندي، ستلج درياهه ۾ هريڪي ڊائون اسٽريم ۽ فيروز پور ڊائون اسٽريم ۾ مٿانهين درجي جي ٻوڏ آهي. پي ڊي ايم اي پنجاب هريڪي ڊائون اسٽريم ۽ فيروز پور ڊائون اسٽريم ۾ مٿانهين درجي جي ٻوڏ جو الرٽ جاري ڪندي مقامي انتظاميا کي شهرين جي حفاظت يقيني بڻائڻ جي هدايت ڪئي آهي. سي پي او ملتان صادق علي موجب جلال پور پيروالا ۾ صورتحال خراب ٿيڻ سبب پاڪ فوج کان مدد طلب ڪئي وئي آهي، ريسڪيو آپريشن ۾ پاڪ فوج جون 14 ٻيڙيون حصو وٺي رهيون آهن، ريسڪيو 1122 جون 8 ٻيڙيون، جڏهن ته پوليس 5 خانگي ٻيڙيون به آپريشن ۾ شامل ڪيون آهن، مجموعي طور تي 27 ٻيڙيون متاثرن کي ريسڪيو ڪرڻ ۾ مصروف آهن. چناب درياءُ ۾ پاڻي جي وڌندڙ دٻاءَ سبب جلالپور پيروالا شهر خالي ڪرڻ جو حڪم جاري ڪيو ويو آهي. سي پي او عوام کي اپيل ڪئي آهي ته فوري طور تي پنهنجا گهر خالي ڪري محفوظ هنڌن ڏانهن منتقل ٿي وڃن. ان سلسلي ۾ مسجدن ذريعي اعلا پڻ ڪيا پيا وڃن. صادق علي ڊوگر ٻڌايو ته ماڻهن کي بچائڻ لاءِ 5 ٿرمل ٽيڪنالاجي ڊرون ۽ 50 وڌيڪ ٻيڙيون تعلقي جلالپور لاءِ گهرائي ويون آهن .
