بيجنگ (ويب ڊيسڪ) چين آمريڪي صدر ڊونلڊ ٽرمپ طرفان هارورڊ يونيورسٽي ۾ پرڏيهي شاگردن جي داخلا تي پابنديءَ واري فيصلي کي تعليم دشمن سياست قرار ڏيندي سخت تنقيد جو نشانو بڻايو آهي.
پرڏيهي خابرو اداري موجب، چيني پرڏيهي وزارت جي ترجمان چيو آهي ته اسان تعليم سان دشمنيءَ تي ٻڌل سياست جي مخالفت ڪريون ٿا.
ترجمان چيو ته آمريڪي ساک تي اهڙو فيصلو ناڪاري اثر وجهندو ۽ بين الاقوامي علمي سهڪار تي به سوال اٿاري رهيو آهي.
کين کانسواءِ ٻين ملڪن به ان فيصلي کي غير مناسب قرار ڏيندي چيو آهي ته ان فيصلي اعليٰ تعليم جي خواهشمند هزارين نوجوانن کي غيريقيني ۾ مبتلا ڪري ڇڏيو آهي.
ٻئي پاسي آمريڪي اندروني سلامتي واري کاتي جو چوڻ آهي ته اِهو قدم هارورڊ تي ذميواريءَ جو مظاهرو ڪرڻ لاءِ کنيو ويو آهي ڇوته يونيورسٽي ڪئمپس ۾ ٿيل احتجاجي مظاهري ۾ پرڏيهي شاگرد ۽ عملو ملوث هو.
بيان ۾ وڌيڪ چيو ويو آهي ته پرڏيهي شاگردن ۽ عملي مان ڪجهه جو واسطو چين جي اهڙن ادارن ۽ تنظييمن سان به هو جن کي آمريڪي سيڪيورٽي خدشن جي بنياد تي بليڪ لسٽ ڪيو ويو آهي.
بيان ۾ هارورڊ يونيورسٽي جي عملي ۽ شاگردن تي چين جي ڪميونسٽ پارٽيءَ سان سهڪار ۽ عسڪري تحقيق ۾ ملوث ادارن سان رابطن جو الزام پڻ مڙهيو ويو آهي.
ياد رهي ته 2009ع کان وٺي آمريڪا جي يونيورسٽين ۾ چيني شاگردن جو انگ هميشه مٿي رهيو آهي، پر گذريل ٻن ٽن سالن دوران اها گهٽتائيءَ رڪارڊ ڪئي وئي آهي.
ان جو ڪارڻ ويجهڙائي وارن سالن ۾ آمريڪا ۾ سيڪيورٽي خدشن کي نظر ۾ رکندي چيني شاگردن خلاف پاليسيون سخت ڪرڻ آهي.
جنهن جو هڪ مثال ٽرمپ جي پهرين صدارتي دور ۾ ”چائنا انيشيٽيئو“ آهي جنهن کي بعد ۾ مخالفت سبب بند ڪيو ويو هو.
پر ٽرمپ جي ٻئي صدارتي دور جي شروعات ۾ مڙهيل تازين پابندين سان نه رڳو شاگردن پر آمريڪا جي تعيلمي ساک ۽ چين سان لاڳاپن کي به ڌڪ رسيو آهي.
