ميرپورخاص(بيورورپورٽ) ڊاڪٽر شاهنواز ڪنڀر جي قتل ڪيس ۾ نامزد اڳوڻي ڊي آءِ جي ۽ ايس ايس پي کي ايف آءِ اي گرفتار ڪرڻ ۾ ناڪام ٿي وئي، دهشتگردي جي خاتمي واري عدالت ڪيترائي ڀيرا ضمانت نه ٿيڻ جوڳا وارنٽ جاري ٿيڻ جي باوجود جوابدارن کي گرفتار نه ڪرڻ تي سخت پڇاڻو ڪندي هڪ ڀيرو ٻيهر ضمانت نه ٿيڻ جوڳا وارنٽ جاري ڪندي ڊي آءِ جي ۽ ايس ايس پي کي گرفتار ڪري ايندڙ پيشي تي پيش ڪرڻ جو حُڪم ڏئي ڇڏيو آهي. ڊاڪٽر شاهنواز ڪنڀر کي ميرپورخاص پوليس پاران جڙتو مقابلي ۾ واري ڪيس جي ٻڌڻي ميرپورخاص جي دهشتگردي جي خاتمي واري عدالت ۾ ٿي. ٻڌڻي ۾ ڪورٽ پاران اڳوڻي ڊي آءِ جي ميرپورخاص جاويد جسڪاڻي ۽ اڳوڻي ايس ايس پي ميرپورخاص چوڌري اسد سميت 06 روپوش جوابدارن جا ضمانت نه ٿيڻ جوڳا وارنٽ جاري ڪرڻ جي باوجود جوابدارن کي گرفتار ڪرڻ ۾ ناڪام رهڻ تي عدالت پاران ايف آءِ اي جي جاچ آفيسر کان سخت پڇاڻو ڪيو هڪ ڀيرو ٻيهر ڊي آءِ جي، ايس ايس پي سميت 06 روپوش جوابدارن جا ضمانت نه ٿيڻ جوڳا وارنٽ جاري ڪندي ٻڌڻي 11 اپريل تائين ملتوي ڪندي جوابدارن کي ايندڙ ٻڌڻي تائين گرفتار ڪري عدالت ۾ پيش ڪرڻ جون هدايتون جاري ڪيون آهن. عدالت ٻاهران فريادي ڌر جي وڪيل اعجاز ھاليپوٽو صحافين سان ڳالهائيندي چيو ته جوابدارن جي وڪيل پاران عدالت ۾ درخواست داخل ڪئي ھئي ته هن ڪيس کي دھشتگردي جي انت واري عدالت ۾ هلڻ بدران سيشن ڪورٽ ڏانھن منتقل ڪيو وڃي، فريادي ڌر جي وڪيل جي ڏنل انهي درخواست تي بحث ٿيڻو ھو پر جوابدارن جي وڪيل پاران عدالت ۾ موجود نه هجڻ تي ان معاملي تي بحث نه ٿي سگھيو.
