ڪراچي ( رپورٽر ) ناجائز منافعي خورن خلاف سخت ڪارروائي ڪرڻ ۽ ريٽ لسٽون نه لڳائيندڙ جا دڪان سيل ڪرڻ جو فيصلو ڪيو ويو آهي. ڊائريڪٽر جنرل بيورو آف سپلائي پرائسز ڊاڪٽر شاڪر قيوم خانزاده جي صدارت هيٺ پرائس ڪنٽرول بابت اهم اجلاس ٿيو، اجلاس ۾ ڪراچي سميت سنڌ جي سمورن ڊويزنن جي آفيسرن شرڪت ڪئي. سنڌ جي ڊائريڪٽر جنرل هدايت ڪئي ته عوام کي رليف فراهم ڪرڻ کان علاوه ذخيره اندوزن ۽ بليڪ مارڪيٽنگ ڪندڙن کي منهن ڏيڻ لاءِ حڪمت عملي جوڙي وئي آهي، روزاني جي بنياد تي سخت چيڪنگ جو به فيصلو ڪيو ويو آهي. هن وڌيڪ آفيسرن کي هدايت ڪئي ته ذخيره اندوزن کي ڪابه رعايت نه ڏني ويندي، مارڪيٽن جي نگراني لاءِ ٽي شفٽون لڳايون وڃن ۽ حڪومت پاران جاري ڪيل پرائس لسٽن تي عمل ڪرايو وڃي. ماني، ڊبل روٽي، کير، ڌونئري، ڪڪڙ ۽ آنن جي اگهن تي ڌيان ڏنو وڃي، ريٽ لسٽون نه ظاهر ڪندڙ دڪانن کي سيل ڪيو وڃي، سنڌ حڪومت اگهن تي عملدرآمد لاءِ هر ممڪن قدم کڻي رهي آهي.
