اسلام آباد (م ڊ) پاڪستان تحريڪ انصاف جي باني چيئرمين عمران خان حڪومت سان ڳالهيون ختم ڪرڻ جو اعلان ڪري ڇڏيو آهي، ان حوالي سان پي ٽي آءِ چيئرمين بئريسٽر گوهر ميڊيا سان ڳالهائيندي ٻڌايو ته باني پي ٽي آءِ سان منهنجي ۽ ٻين وڪيلن جي ملاقات ٿي، پي ٽي آءِ باني حڪومت سان ڳالهيون ختم ڪرڻ جو اعلان ڪيو، بئريسٽر گوهر چيو ته حڪومت کي 7 ڏينهن ۾ ڪميشن جوڙڻيون هيون، پر اڃا تائين حڪومت طرفان 9 مئي ۽ 26 نومبر تي جڊيشل ڪميشن نه جوڙي وئي آهي، تنهنڪري ڳالهيون ختم ڪرڻ جو اعلان ڪري رهيا آهيون، هن واضح ڪيو ته ڳالهين جا وڌيڪ رائونڊ نه ٿيندا، اسان جي وڏي خواهش هئي ته ڳالهيون جاري رهن ۽ معاملا اڳتي وڌن پر افسوس آهي ته حڪومت طرفان اڄ تائين ڪو به اعلان ناهي ڪيو ويو، اسان کي ڪنهن به پرڏيهي مدد جو انتظار ناهي، سڀني سياسي جماعتن سان گڏجي جدوجهد شروع ڪنداسين، ٻي پاسي پريس ڪانفرنس ڪندي عرفان صديقي پي ٽي آءِ کي پيغام ڏنو آهي ته هو پنهنجي فيصلي تي نظرثاني ڪري ۽ ڳالهيون ڪرڻ تي غور ڪن، حڪومتي ڪميٽي اڃا قائم آهي، اسين ان معاملي تي وڌيڪ ملاقاتون ڪنداسين، هن چيو ته پهرين اجلاس ۾ فيصلو ڪيو ويو هو ته پي ٽي آءِ وارا ٻئي اجلاس ۾ پنهنجا مطالبا لکت ۾ آڻيندا پر ان ۾ کين 6 هفتا لڳي ويا ۽ اسان کان اها پيا ڪن ته پنجن ڏينهن اندر مطالبن جو جواب ڏيو، اسان انهن مطالبن کي سنجيدگي سان ورتو، اسان پاڻ ۾ مشاورت ڪئي، فيصلو ڪيو ويو آهي ته حڪومتي ڪميٽي ستن ڏينهن اندر اپوزيشن جي مطالبن تي پنهنجو باضابطا تحريري موقف پيش ڪندي، اتفاق ڪرڻ کان پوءِ مون کي سمجهه ۾ نه ٿو اچي ته انهن ستن ڏينهن ۾ ڇا ٿيو آهي؟ عرفان صديقي چيو ته هو ان ئي شوق سان واپس وڃي رهيا آهن جنهن شوق سان آيا هئا، اسان کين چئون ٿا ته اڃا انتظار ڪريو.
