لکي غلام شاهه (رپورٽ: نديم جان مهر) رستم ٿاڻي جي حد رستم-فيضو روڊ تي مرزا واھ ڀرسان 5 ڏينهن اڳ مير غالب ڊومڪي جي گاڏي تي هٿياربندن جي حملي ۾ ڪشمور واسي سالار ڊومڪي ۽ الهه بخش ڊومڪي قتل ٿي ويا هئا. فريادي الهداد ڊومڪي 13 سڃاتلن ۽ 10 اڻڄاتلن خلاف دهشتگردي ايڪٽ تحت ڪيس داخل ڪرائي دعويٰ ڪئي ته حملو اغوا ۽ قتل جي ارادي سان ڪيو ويو. ٻئي پاسي، ساڳئي واقعي بابت پوليس سرڪار جي فرياد تي پوليس عملدار طارق حسين ڪلھوڙي جي فرياد تي رستم ٿاڻي تي پڻ ڪيس داخل ڪيو، جنهن ۾ ڄاڻايو ويو ته ڏوهارين، پوليس سان مقابلي دوران فائرنگ ڪئي، جنهن ۾ ڏوهاري نادر ميراڻي مارجي ويو. ان جي پلاند ۾ ڪشمور واسي ٻن نوجوانن کي قتل ڪيو ويو. پوليس مقابلي ۾ مارجي ويل نادر ميراڻي جو لاش پنج ڏينهن کان شڪارپور اسپتال جي سرد خاني ۾ پيل آهي. واقعي ۾ پي ٽي آءِ اڳواڻ مير غالب خان ڊومڪي ۽ سندس گهرواري سميت 5 ڄڻن جي زخمي ٿيڻ جو ذڪر ٻنهي ڪيسن ۾ شامل ناهي ڪيو ويو. ڪيس ۾ سڃاتل جوابدارن ۾ الطاف عرف ارطو، شبير، گامڻ ڪمالاڻي، نادر عرف نادرو ميراڻي، واجد عرف واجو سومرو، در محمد عرف گگو، مٺل عرف ڪٽو، ملنگ سعدخاناڻي، انجنيئر، قلندرو، بادشاهه عرف باشو سعد خاناڻي ۽ امين دوداڻي شامل آهن.
