اسلام آباد(بيورو رپورٽ) وزيراعظم شهباز شريف آرمي چيف جنرل عاصم منير ۽ فورسز جي سهڪار کي مثالي قرار ڏنو. اڏام پاڪستان جي تقريب کي خطاب ڪندي شهباز شريف چيو ته حڪومت سان آرمي چيف ۽ فورسز جو تعاون مثالي آهي، هن پنهنجي سياسي زندگي ۾ اهڙي ڀائيواري نه ڏٺي آهي. هن چيو ته ڪيترائي وسوسا آهن، منهنجي دعا آهي ته ملڪ جي بهتري لاءِ ڀائيواري هميشه قائم رهي. وزيراعظم شهباز شريف قومي اقتصادي منصوبي ”اڙان پاڪستان 29-2024“ پروگرام جو افتتاح ڪندي ان موقعي کي پاڪستان لاءِ عظيم ڏينهن قرار ڏنو. ۽ چيو ته اڳوڻي ڀارتي وزيراعظم من موهن سنگهه ڀارت کي ترقي ڏيارڻ لاءِ اڳوڻي پاڪستاني وزيراعظم نواز شريف جو ماڊل اختيار ڪيو. پروگرام جي افتتاحي تقريب کي خطاب ڪندي هن چيو ته اڄ وڏو ڏينهن آهي. مشڪلاتن باوجود اسان معاشي پاڻ ڀرائپ حاصل ڪري وياسين. هن چيو ته مان ان موقعي تي ڪا به سياسي ڳالهه نه ڪندس. پاڪستان تباهي جي ڪناري تي پهچي چڪو هو. ان کان بچڻ لاءِ اسان جي قيادت ۽ اتحادين فيصلو ڪيو ته سياست، نه رياست کي بچائڻ لاءِ ڪنهن به حد تائين ويندا ۽ نتيجا ڀوڳڻا پوندا. وزيراعظم چيو ته آءِ ايم ايف پروگرام روڪڻ لاءِ خط لکيا ويا، پروگرام نه ٿيڻ گهرجي. شهباز شريف چيو ته پاڪستان جي عوام 38 سيڪڙو مهانگائي جو بار برداشت ڪيو، واپاري 22 سيڪڙو وياج شرح ڏسي ڊڄي ويا. مٽا سٽا جا ذخيرا محدود هئا. اسان کي IMF جو ٻيو پروگرام وٺڻ تي مجبور ڪيو ويو. ان لاءِ صوبائي حڪومتون وفاقي حڪومت سان ڀرپور سهڪار ڪن، ان کانسواءِ اهو ممڪن نه هو. هن چيو ته منهنجي دعا آهي ته هي پاڪستان جي تاريخ جو آخري پروگرام هجي. پاڙيسري ملڪ 90ع واري ڏهاڪي کانپوءِ آءِ ايم ايف ڏانهن پوئتي نه ڏٺو. هن چيو ته قدرت هن ملڪ کي وسيلا ڏنا آهن پر سوچڻ جي ڳالهه آهي ته اسان کي هڪ ڀيرو ٻيهر آءِ ايم ايف پروگرام ڇو وٺڻو پيو. وزيراعظم چيو ته گذريل هڪ ڏهاڪي ۾ سرڪاري ادارن کي 6 ٽريلين جو نقصان ٿيو آهي، آءِ ايم ايف پروگرام ۾ اسان کي 7 ارب ڊالرن جا قرض ملي رهيا آهن ته جيئن ملڪي استحڪام ۽ پاڪستان کي ترقي جي رفتار ڏانهن وٺي وڃي. شهباز شريف چيو ته ماضيءَ ۾ مغرور ۽ غير مقبول روين جي ڪري دنيا ۾ اڪيلو ٿي وياسين. اسان هڪ دوست ملڪ کان هڪ ارب ڊالرن جو قرض گهريو، اتي جي اشرافيه مون کي ٻڌايو ته اسان پاڪستان کي اڌ ارب ڊالر ڏيڻ جو فيصلو ڪيو آهي. شهباز شريف صاحب اوهان جي ملڪ مان جواب آيو ته ان کي واپس رکو، اسان نٿا چاهيون. وزيراعظم چيو ته مون کي ٻڌايو ته توهان اهو مطالبو ڪري رهيا آهيو ۽ توهان مٿي کان اصرار ڪري رهيا آهيو ته اسان اهو نٿا چاهيون، اهو وڏو تضاد آهي.
