ڪراچي (ويب ڊيسڪ) پاڪستان ميڊيڪل ڪانفرنس ۽ آل پاڪستان يوناني جوائنٽ ايڪشن ڪميٽي نيشنل ڪائونسل فار طب ۽ نيشنل ڪائونسل فار هوميوپيٿي کي نئين ڪائونسل ۾ ضم ڪرڻ واري حڪومتي مسودي کي رد ڪري ڇڏيو.
ڪراچي جي علائقي ناظم آباد جي مقامي هال ۾ پاڪستان ميڊيڪل ڪانفرنس ۽ قاسمي ميڊيڪل ڪاليج جي سهڪار سان قائم مقام صدر پاڪستان ميڊيڪل ڪانفرنس سنڌ ۽ ڪنوينر جوائنٽ ايڪشن ڪميٽي سنڌ حڪيم نسيم احمد قاسمي جي صدارت هيٺ احتجاجي اجلاس ٿيو، جنهن ۾ چيئرمين جوائنٽ ايڪشن ڪميٽي پروفيسر حڪيم منصور العزيز، ڪنوينر جوائنٽ ايڪشن ڪميٽي سنڌ حڪيم نسيم احمد قاسمي، پاڪستان ميڊيڪل ڪانفرنس جي مرڪزي اڳواڻ حڪيم مختيار احمد برڪاتي، نيشنل ڪائونسل فار طب حڪيم محمد اڪبر درس، باني ۽ چيئرمين هوميو پيٿ ڊاڪٽر حڪيم محمد اڪبر درس سميت ٻين شرڪت ڪئي.
تقريب ۾ ڊاڪٽر منير منشي، نيشنل ڪائونسل فار هوميوپيٿڪ ڪائونسل جي اڳوڻي نائب صدر سيد جاويد علي شاهه ۽ ٻين ناليوارن عالمن ۽ يوناني طب سان لاڳاپيل شاگردن پڻ وڏي انگ ۾ شرڪت ڪئي.
احتجاجي اجلاس کي خطاب ڪندي پروفيسر حڪيم منصور العزيز، ڊاڪٽر منير منشي، حڪيم نسيم احمد قاسمي ۽ ٻين چيو ته هو نيشنل ڪائونسل فار طب ۽ نيشنل ڪائونسل فار هوميوپيٿي کي ضم ڪرڻ واري حڪومتي فيصلي کي رد ڪن ٿا، يوناني طب جي تاريخ تمام پراڻي آهي، ان خلاف سازش اڄ جي نه پر انگريزن جي دور جي آهي.
نامور حڪيمن ڌمڪي ڏيندي چيو ته جيڪڏهن حڪومت نيشنل ڪائونسل فار طب ۽ نيشنل ڪائونسل فار هوميوپيٿي جي تجويز ڪيل انضمام واري فيصلي کي واپس نه ورتو ته سڄي ملڪ ۾ احتجاج ڪيو ويندو.
