ڪراچي(ويب ڊيسڪ) ڪمشنر ڪراچي حسن نقوي شهر ۾ هيٽ اسٽروڪ سبب فوتگين وارين خبرن جي ترديد ڪندي چيو آهي ته شهر ۾ ايتريون فوتگيون ناهن ٿيون، فوتگين جي حوالي سان جيڪي انگ اکر جاري ڪيا ويا آهن اهي غلط آهن.
ڪمشنر هائوس ۾ ميڊيا سان ڳالهائيندي حسن نقوي جو چوڻ هو ته ڪراچي ۾ هيٽ اسٽروڪ سبب 1700 شهري متاثر ٿيا ۽ ڏهه فوتگيون ٿيون آهن پر شهر ۾ فوتگين جي شرح ۾ 4 کان 5 سيڪڙو واڌ ٿي آهي.
هن ٻڌايو ته ڪراچي ۾ هيٽ ويو سبب پيدا ٿيندڙ صورتحال ڪنٽرول ۾ آهي، شهر جي سمورن وڏين اسپتالن، مردا خانن ۽ ٻين ذريعن وٽان معلومات حاصل ڪئي آهي، وڌيڪ فوتگين جي حوالي سان جيڪي انگ اکر ٻڌايا پيا وڃن اهي غلط آهن.
سندس چوڻ هو ته شديد گرمي ۽ هيٽ ويو سبب شهري بجلي کانسواءِ ڏکيائين کي منهن ڏئي رهيا آهن، جلد ڪي اليڪٽرڪ جي اختيارين سان ملاقات ڪري لوڊشيڊنگ نه ڪرڻ جون هدايتون ڏيندس.
Pakistan Karachi HeatStroke
