ڪراچي (پ ر) همدرد شوريٰ ڪراچي جو ماهوار اجلاس ڪالهه خميس ڏينهن همدرد فائونڊيشن پاڪستان جي صدر محترمه سعديه راشد جي صدارت ۾ ”سرڪاري ادارن جي نجڪاري ۽ بندش ۽ فارغ ڪيل ملازمن جو مستقبل“ جي عنوان هيٺ اسپيڪر جنرل (ر) معين الدين حيدر جي صدارت هيٺ همدرد ڪارپوريٽ هيڊ آفيس ۾ ٿيو. جنهن ۾ شرڪت ڪندڙن سرڪاري ادارن جي نجڪاري جي فيصلي جي آجيان ڪئي ۽ اميد ظاهر ڪئي ته نجڪاري جي عمل ۾ قومي اثاثن جي وڪري بابت سمورا معاملا شفاف نموني حل ڪيا ويندا.
جنرل (ر) معين الدين حيدر چيو آهي ته رياستي ملڪيتي ادارن جي ناڪامي ۽ مسلسل خساري جي بنيادي سببن ۾ ضرورت کان وڌيڪ ڀرتيون ۽ ملڪ جي مجموعي معاشي حالتون شامل آهن. بدقسمتي سان پاڪستان ۾ اهڙي صورتحال ڪڏهن به نه رهي آهي جو مختلف شعبن ۾ مسلسل پرڏيهي سيڙپڪاري ٿيندي رهي هجي جنهن سبب ملڪ ۾ نوجوانن لاءِ روزگار جا موقعا گهٽ رهيا. انهن نوجوانن کي مجبورن رياستي ملڪيتي ادارن ۾ کپايو ويو.
موجوده معاشي چئلينجز حڪومت کي مجبوري ڪري ڇڏيو ته هو پنهنجا خرچ گهٽ ڪري نجڪاري ذريعي 25 ايس او ايز جي انتظامي معاملن تان پوئتي هٽن.
سڌي ۽ اڻ سڌي طرح ٽيڪسن ۾ اضافو عام ماڻهن جي قوت خريد تي خراب اثرانداز ٿيو آهي. اسان عوام ڏهاڪن کان رياستي ادارن ۽ کاتن ۾ بدانتظامي ۽ ڪرپشن جو ثمر ڀوڳي رهيا آهيون.
ظفر اقبال، ڪموڊور (رٽائرڊ) صديق انور ملڪ، انجنيئر انوار الحق، رضوان احمد، سلطان چاولا، عامر طاسين، هما بيگ، سينيٽر عبدالحسيب خان، پروفيسر ڊاڪٽر ڀواني شنڪر ۽ ڪرنل (ر) مختار احمد بٽ چيو ته سرڪاري ادارا اوور اسٽاف ۽ بدانتظامي سبب خساري جو شڪار آهن، خدشو آهي ته انهن کي خانگي شعبي جي حوالي ڪرڻ سان ڪيترائي ملازم بيروزگار ٿي ويندا.پرائيويٽائيزيشن جي عمل کي شروع ڪرڻ کان اڳ سڀني حاصل ڪندڙن کي اعتماد ۾ وٺڻ گهرجي ڇو ته بيروزگاري سماجي مسئلن ۽ بيچيني کي جنم ڏئي سگهي ٿي. بدقسمتيءَ سان ايس اوز ۾ ملازمت ڪندڙ اهڙن ماڻهن کي ٻاهر نه ٿو موڪلي سگهجي ڇاڪاڻ ته انهن مان گهڻا نه ته جديد تعليم سان ليس آهن ۽ نه ئي هنرمند آهن.
انهن لاءِ آمدني جا متبادل ذريعا جهڙوڪ بالغن لاءِ تعليم ۽ مهارت هنرمندي وارا ڪورسز متعارف ڪرائڻ جي ضرورت آهي. ايس اوز جا ڪيترائي ملازم اڳ ۾ ئي آمدني جي متبادل ذريعن ۾ مصروف آهن. ٻي صورت ۾ ڇھ مهينا پگهار کان سواءِ ڪيئن رهي سگهن ٿا.
پر پوءِ به جيڪڏهن انهن ماڻهن کي برطرف ڪيو وڃي ته انهن کي گولڊن هينڊ شيڪ جهڙين اسڪيمن ذريعي سٺي رقم ملندي، جنهن ذريعي هو ڪو به ننڍو ڪاروبار شروع ڪري سگهن ٿا. نجڪاري کانپوءِ وڏي پئماني تي بيروزگاري پکڙجڻ جا خدشا غلط آهن.
پي ٽي سي ايل ۽ ڪي اليڪٽرڪ جي نجڪاري حڪومت لاءِ فائديمند ثابت ٿي، ڇاڪاڻ ته رياست وٽ انهن ڪمپنين جا اڪثريتي شيئر آهن، سرڪاري فنڊن ۾ هر سال ڪروڙين رپيا حڪومتي فنڊز ۾ جمع ٿين ٿا.
ان کان علاوه نجڪاري سان پي ٽي سي ايل ۽ ڪي اليڪٽرڪ جي ڪارڪردگيءَ ۾ اضافو ٿيو آهي، سيڙپڪارن سان هڪ معاهدو ڪيو وڃي ته اهي ڪنهن به ملازم کي گهٽ ۾ گهٽ هڪ سال لاءِ برطرف نه ڪندا ۽ کين پنهنجي صلاحيت ثابت ڪرڻ جو موقعو ڏيندا. رياست جو ڪم ڪاروبار ڪرڻ نه پر ڪاروبار لاءِ سازگار ماحول پيدا ڪرڻ ۽ معاشي سرگرمين کي منظم ڪرڻ آهي. اسٽيل ملز منافع بخش ٿي سگهن ٿيون ڇاڪاڻ ته پوري دنيا ۾ اسٽيل جي طلب آهي. ملڪ جو سڀ کان وڏو مسئلو بدانتظامي آهي جنهن کي منهن ڏيڻ جي ضرورت آهي.
