راولپنڊي (م ڊ) سپريم ڪورٽ جي چيف جسٽس طرفان عمران خان کي سياسي جماعتن سان ڳالهين جي مشوري تي پي ٽي آءِ باني راضپو ظاهر ڪري ڇڏيو ۽ ان حوالي سان هن سپريم ڪورٽ کي خط لکڻ جو فيصلو ڪيو آهي. ذريعن موجب خط جو متن هن نوٽ ڪرائي ڇڏيو آهي. ذريعن موجب عمران خان اهو خط ملڪ جي معاشي ڏکيائين ۽ سياسي غير يقيني ختم ڪرڻ لاءِ لکي رهيو آهي. سندس موقف آهي ته ملڪ جي معاشي ۽ سياسي مضبوطي لاءِ هو هر سنجيده ڌر سان ڳالهين لاءِ تيار آهي. ذريعن موجب خط جي نڪتن ۾ هن لکرايو آهي ته هو هر ڌر جيڪا معاشي ۽ سياسي مسئلا حل ڪرڻ جي سگهه رکي ٿي، ان سان ڳالهائي سگهي ٿو، جڏهن ته چونڊ مينڊيٽ جي واپسي، 9 مئي جڊيشل انڪوائري سميت ٻين سياسي ڪيسن ۾ فيئر ٽرائل ڪيو وڃي. واضح رهي ته نيب ترميمن جي ڪيس جي ٻڌڻي دوران چيف جسٽس قاضي فائز عيسيٰ عمران خان کي سياسي جماعتن سان ڳالهين جي صلاح ڏني هئي.
