ڪراچي (رپورٽر ) متحده قومي موومينٽ پاڪستان سڄي سنڌ ۾ رينجرز کي برابر اختيار ڏيڻ جو مطالبو ڪري ڇڏيو آهي. ڪراچي ۾ پريس ڪانفرنس ڪندي ايم ڪيو ايم پاڪستان جي اڳواڻن چيو ته رينجرز کي رڳو ڪراچي ۾ اختيار ڏيڻ سان ڏوهن جو سلسلو بند نه ٿيندو، رينجرز کي سڄي صوبي ۾ برابر جا اختيار ڏنا وڃن ۽ پوليس مان ڪاري رڍن جو خاتمو ڪيو وڃي، ڇو ته ان کانسواءِ پوليس مان ڪاري رڍن جو خاتمو نه ٿيڻ گهرجي. جرم کي ختم نٿو ڪري سگهجي.سينيٽر فيصل سبزواري چيو ته سنڌ حڪومت چونڊن ۾ ڪاميابيءَ جي چڪر مان نڪري نه سگهي آهي،
ڪراچي ۾ اسٽريٽ ڪرائم جي واقعن ۾ عام شهري مارجي رهيا آهن ۽ ڪيترائي ڀيرا ڏوهاري پوليس جي صفن ۾ اچي ويندا آهن.هن چيو ته پوليس عيد ملهائڻ لاءِ نه آهي پر پوليس جو ڪم ڏوهاري عنصرن کي منهن ڏيڻ آهي، جيڪڏهن سنڌ حڪومت امن امان قائم ڪرڻ لاءِ پاڙيسري نظام نه ٺاهي ته پوءِ ايم ڪيو ايم ٺاهيندي. سنڌ جي گهرو وزير بابت فيصل سبزواري چيو ته ضياءَ لنجار کي گهرو وزير ٿيڻو آهي پر کيس پنهنجو رويو درست ڪرڻو پوندو. ايم ڪيو ايم اڳواڻ خواجا اظهار الحسن چيو آهي ته جڏهن نئون آءِ جي سنڌ لڳايو ويو ته ڏوهارين ۾ خوشي جي لهر ڇانئجي وئي، لڳي ٿو ته ڏوهارين کي لائسنس ملي ويو آهي. هن چيو ته سنڌ حڪومت وفاق کي بليڪ ميل ڪري پنهنجي پسند جو آءِ جي مقرر ڪيو آهي. پريس ڪانفرنس ۾ ايم ڪيو ايم پاڪستان جي اڳواڻن چيف جسٽس سنڌ هاءِ ڪورٽ کان مطالبو ڪيو ته ڪراچي ۾ امن امان جي خراب صورتحال جو نوٽيس وٺي وفاقي ۽ صوبائي حڪومتون به امن امان جي قيام لاءِ سنجيده قدم کڻن.
