ڪراچي (ويب ڊيسڪ) سنڌ جي ورهاڱي بابت غلط، ورغلائيندڙ ۽ غير تصديق ٿيل سروي جا نتيجا نشر ۽ عام ڪرڻ تي ايڊووڪيٽ احمد علي گبول طرفان اي آر واءِ نيوز جي چيف ايگزيڪيوٽو آفيسر کي قانوني نوٽيس موڪلي ڇڏيو.
12 آگسٽ 2026ع تي موڪليل قانوني نوٽيس ۾ ايڊووڪيٽ احمد علي گبول موقف اختيار ڪيو آهي ته سنڌ جي ڊويزن يا ٻيهر جوڙجڪ بابت نشر ڪيل سروي جا نتيجا غلط، گمراهه ڪندڙ ۽ غير تصديق ٿيل آهن، جيڪي آئيني اسڪيـم، پاڪستان اليڪٽرانڪ ميڊيا ريگيوليٽري اٿارٽي جي قانون ۽ لاڳو ريگيوليٽري فريم ورڪ جي ڀڃڪڙي ڪن ٿا.
ايڊووڪيٽ احمد علي گبول موجب، هو قانون جو پابند، پرامن ۽ ذميوار شهري ۽ سنڌ هاءِ ڪورٽ جو وڪيل آهي ۽ ڄاڻايل نشريات سبب متاثر ڌر آهي.
قانوني نوٽيس ۾ اي آر واءِ نيوز کان مطالبو ڪيو ويو آهي ته اعتراض هيٺ آيل مواد فوري طور هٽايو ۽ واپس ورتو وڃي، ان بابت درستگي ۽ ترديد نشر ڪئي وڃي ۽ لاڳاپيل رڪارڊ محفوظ رکيو وڃي.
نوٽيس ۾ وڌيڪ چيو ويو آهي ته معاملي بابت آزاد ريگيوليٽري جاچ ڪرائي وڃي ۽ قانوني ذميوارين تي عملدرآمد کي يقيني بڻايو وڃي، جڏهن ته اهڙي مواد جي ٻيهر نشريات يا ورجاءَ کي روڪڻ لاءِ مناسب قدم کنيا وڃن.
قانوني نوٽيس ۾ چتاءُ ڏنو ويو آهي ته جيڪڏهن مطالبن تي عمل نه ڪيو ويو ته درخواستگذار مناسب آئيني ۽ لازمي قانوني داد رسي لاءِ لاڳاپيل عدالت يا فورم سان رابطو ڪندو، جنهن ۾ مواد کي هٽائڻ ۽ واپس وٺڻ، درستگي نشر ڪرڻ، رڪارڊ محفوظ رکڻ، آزاد ريگيوليٽري جاچ ۽ قانوني ذميوارين تي عملدرآمد سميت ٻيا مناسب رليف طلب ڪيا ويندا.
نوٽيس جي ڪاپي پاڪستان اليڪٽرانڪ ميڊيا ريگيوليٽري اٿارٽي (پيمرا) جي چيئرمين کي پڻ موڪلي وئي آهي.
