حيدرآباد(رپورٽر) آبپاشي کاتي جي صوبائي وزير ڄام خان شورو چيو آهي ته موسمياتي تبديلي جي ڪري پاڻي اڳ ۾ ئي گهٽجي ويو آهي، هاڻي وڌيڪ پاڻي کسڻ جي ڳالهه ٿي رهي آهي. پاڻي جي هن مصنوعي کوٽ جو سڀ کان وڌيڪ خطرناڪ ۽ سڌو اثر انڊس ڊيلٽا تي پئجي رهيو آهي،جيڪڏهن ڀارت سنڌ طاس معاهدي جي ڀڃڪڙي ڪري پاڻي روڪيو ته پاڪستان طرفان ڀارت کي ڀرپور ۽ مناسب جواب ملندو، ڀارت چڱي طرح ڄاڻي ٿو ته اسان جي طاقت ڇا آهي، ان اسان کي آزمايو آهي. حيدرآباد پريس ڪلب ۾ هنگامي پريس ڪانفرنس ڪندي ھن چيو ته هن وقت سڀ کان وڏو مسئلو ڀارت پاران سنڌو پاڻي معاهدي (سنڌ طاس معاهدي) تي عمل نه ڪرڻ آهي. جنهن تي اسان جون زمينون آباد ٿين ٿيون، ان جو رخ موڙيو ويو ته اهو جنگ جو اعلان هوندو. ڀارت پاڻي روڪيو ته اسان صرف گڏيل قومن ڏانهن نه وينداسين، ڀارت هڪ طرفي طور تي پاڻي سان لاڳاپيل سڀئي خط و ڪتاب بند ڪري ڇڏيا آهن. هن چيو ته ڀارت صرف ڪم ڪرڻ شروع ڪري اسان دنيا ڏانهن ڏسڻ بدران اسان سڌي فوجي ڪارروائي ڪنداسين. هن چيو ته ڀارت پاڻي کي موڙڻ لاءِ پٿرن جو هڪ ٽرڪ به لاٿو ته اسان ساڳئي ڏينهن جنگ جو اعلان ڪنداسين. هاڻ دنيا کي ٻاڏائڻ جو وقت ختم ٿي ويو آهي، هاڻي پاڻي تي ڪو به سمجهوتو نه ٿيندو.
