ڪراچي(عوامي آواز نيوز)متحده قومي موومينٽ (ايم ڪيو ايم) بزنس فورم پاران وفاقي شيڊو بجيٽ پيش ڪئي وئي.ڪراچي ۾ ايم ڪيو ايم اڳواڻ ڊاڪٽر فاروق ستار پريس ڪانفرنس دوران شيڊو بجيٽ پيش ڪئي، ان موقعي تي ڪي سي سي آئي جو صدر ۽ واپاري تنظيمن جا نمائندا موجود هئا.فاروق ستار جو چوڻ هو ته اسان عوام کان نه پر وڏن وڏن سرمائيدارن کان ٽيڪس ڪليڪشن (ٽيڪس گڏ ڪرڻ) جو مطالبو ڪري رهيا آهيون.هن چيو ته فوري طور تي پيٽرول تي ليوي ختم ڪئي وڃي ۽ بينظير انڪم سپورٽ پروگرام بدران بينظير انڪم جينريشن پروگرام هلايو وڃي.ايم ڪيو ايم اڳواڻ وڌيڪ چيو ته پاڪستان جي معاشي خودمختاري ملڪ جي بقا جو معاملو آهي، شهري علائقن (اربن ايرياز) تي ٽيڪس لڳايو ويو آهي جڏهن ته اترين علائقن (ناردرن ايرياز) کي ٽيڪس ۾ ڇوٽ ڏني وئي آهي. ڊاڪٽر فاروق ستار اهو پڻ چيو ته هڪ استاد 60 کان 70 هزار ڪمائي رهيو آهي ۽ انڪم ٽيڪس ڏئي رهيو آهي، پر وڏو جاگيردار ڪو به ٽيڪس نه ڏئي رهيو آهي.سندس چوڻ هو ته پارليامينٽ جي ايوانن ۾ هاريءَ جي هاري، مزدور جي سرمايه دار نه پر مزدور ۽ مڊل ڪلاس (وچولي طبقي) جي نمائندگي پڙهيل لکيل نوجوان ڪري. ايم ڪيو ايم اڳواڻ چيو ته پاڻي، توانائي، بجلي ۽ گئس تي ڪم ڪرڻو آهي، هن سال وفاقي حڪومت جو خسارو 4 فيصد آهي، اسان پنهنجي تجويزن ۾ ان کي 2.2 فيصد تي آڻي رهيا آهيون.ڊاڪٽر فاروق ستار چيو ته اسٽيٽ بئنڪ کي به پاليسي ريٽ اڃا وڌيڪ گهٽ ڪرڻ گهرجي، اسان پاڪستان جي 25 ڪروڙ عوام لاءِ هڪ عوام دوست شيڊو بجيٽ تيار ڪئي آهي.
