ڪراچي (ذوالفقار راڄپر ) سنڌ حڪومت فوتي ڪوٽا بحال ڪرڻ، درآمدي مال لاءِ ليٽرز آف ڪريڊٽ کولڻ ۽ پروسيس ڪرڻ لاءِ سنڌ بئنڪ کي بااختيار بڻائڻ،روان مالي سال 26–2025 دوران روهڙي ريلوي اسٽيشن جي اپ گريڊيشن لاءِ 497.574 ملين رپين جي گرانٽ ان ايڊ جي منظوري ڏيڻ سنڌ ڪابينا جو اجلاس وڏي وزير سيد مراد علي شاهه جي صدارت ۾ ٿيو، جنهن ۾ پاليسي فيصلن جي هڪ سيريز جي منظوري ڏني وئي. انهن ۾ فوتي ڪوٽا جي بحالي، وسيلن جي اجتماعي استعمال ذريعي هارين کي بااختيار بڻائڻ جا اپاءُ، درآمدي مال لاءِ ليٽرز آف ڪريڊٽ کولڻ ۽ پروسيس ڪرڻ لاءِ سنڌ بئنڪ کي بااختيار بڻائڻ، لياري ندي کي ٽي ايم سي لياري جي انتظام هيٺ آڻڻ، ۽ روهڙي ريلوي اسٽيشن جي اپ گريڊيشن لاءِ 497.574 ملين رپيا جاري ڪرڻ، ڳورھاري عورتن جي غذائيت کي بهتر بڻائڻ آهي، جنهن لاءِ لڳ ڀڳ 1.37 ملين سپليمنٽس جون بوتلون فراهم ڪرڻ، ڳورهارين عورتن لاءِ ملٽي پل مائيڪرو نيوٽرينٽ سپليمنٽس جي خريداري لاءِ صحت کاتي ۽ يونيسيف جي وچ ۾ معاهدي تي صحيحون ڪرڻ سميت ٻيا فيصلا ڪيا آهن، اهي فيصلا وڏي وزير هائوس ۾ ٿيل وڏي وزير سيد مراد علي شاهه جي صدارت هيٺ ٿيل سنڌ ڪابينا جي اجلاس ۾ ڪيا ويا، اجلاس ۾ صوبائي وزيرن، مشيرن، معاون خصوصي، چيف سيڪريٽري، وڏي وزير جو پرنسپل سيڪريٽري ۽ ٻين سينيئر آفيسرن شرڪت ڪئي. ڪابينا روزگار جي پاليسي، زراعت، تعليم، صحت، انفراسٽرڪچر ۽ مالي گورننس ۾ وڏين سڌارن جو جائزو ورتو. وڏي وزير ڪابينا جي صلاح سان فيصلو ڪيو ته فوتي ڪوٽا تحت اهي ڪيس جن جون درخواستون سيپٽمبر 2024 کان اڳ داخل ڪيون ويون هيون ۽ اهي ٻين شرطن تي پورا لهن ٿا، انهن تي ميرٽ تي ڪارروائي ڪئي ويندي. ڪابينا نوٽ ڪيو ته فوتي ڪوٽا پاليسي 2002 ۾ متعارف ڪرائي وئي هئي. وڌيڪ مشاهدو ڪيو ويو ته سپريم ڪورٽ آف پاڪستان سپريم ڪورٽ جي 9 سيپٽمبر .سال 2024 جي پنهنجي فيصلي ذريعي فوتي ڪوٽا سان لاڳاپيل تمام قانوني دستاويزن کي امتيازي ۽ قانون جي خلاف قرار ڏنو هو. نتيجي طور، سنڌ حڪومت ان فيصلي جي پيش نظر فوتي ڪوٽا جي ڪيسن تي ڪارروائي روڪي ڇڏي هئي. تفصيلي ويچار کانپوءِ، ڪابينا منظوري ڏني ته سيپٽمبر 2024 کان اڳ داخل ڪيل فوتي ڪوٽا جي ڪيسن تي قانون مطابق غور ڪري سگهجي ٿو ۽ لاڳاپيل کاتن پاران ميرٽ تي ڪارروائي ڪري سگهجي ٿي. سنڌ ڪابينا گهوٽڪي ضلعي جي تعلقي اوٻاوڙو ۾ گهونڊي واري مقام تي مير ڪوش ريگيوليٽر وٽ گهوٽڪي فيڊر جي کاٻي ڪناري تي واقع آبپاشي کاتي جي 6 ايڪڙ زمين پوليس اسٽيشن کنڀڙا جي نئين عمارت ۽ ايمرجنسي ڪيمپ جي تعمير لاءِ الاٽ ڪرڻ جي منظوري ڏني. پوليس اسٽيشن کنڀڙا جي تزويراتي اهميت کي تسليم ڪندي، جنهن جو دائرو اهم صنعتي علائقن، موٽر وي جي حصن، ڪچي جي علائقي ۽ سنڌ واري پنجاب جي سرحدي پوائنٽن تائين پکڙيل آهي، ڪابينا کنڀڙا ڳوٺ جي اندر واقع موجوده پوليس اسٽيشن جي عمارت کي پوليس پوسٽ ۾ تبديل ڪرڻ جي به منظوري ڏني ته جيئن مقامي آبادي کي خدمتن جي فراهمي جاري رهي.نئين عمارت ۽ ايمرجنسي ڪيمپ جي تعمير لاءِ، ڪابينا اسڪيم لاءِ 70 ملين رپيا ۽ مالي سال 27–2026 لاءِ 55.611 ملين رپين جي منظوري ڏني، جڏهن ته ڪل تخمينو لاڳت 125.611 ملين رپيا آهي.سنڌ ڪابينا مڪاني حڪومت کاتي تحت روهڙي ريلوي اسٽيشن جي اپ گريڊيشن لاءِ صوبائي حصي جا فنڊ جاري ڪرڻ جي منظوري ڏني. وڏي وزير ۽ وفاقي وزير ريلوي جي وچ ۾ ٿيل ملاقات ۾ ڪيل فيصلي موجب، پاڪستان ريلوي 40:60 لاڳت جي شراڪت جي بنياد تي ٽينڊرنگ جو عمل شروع ڪيو. 1,277.16 ملين رپين جي ٽينڊر جي منظوري کانپوءِ، سنڌ حڪومت جو 40 سيڪڙو حصو نظرثاني کانپوءِ 497.574 ملين رپيا بڻجي ٿو. ڪابينا پاڪستان ريلوي جي حق ۾ بطور گرانٽ ان ايڊ 497.574 ملين رپيا جاري ڪرڻ جي منظوري ڏني ۽ اهي فنڊ سيڪريٽري لوڪل گورنمينٽ جي حوالي ڪيا ته جيئن اهي ورهايا وڃن. ڪابينا روان مالي سال 26–2025 دوران روهڙي ريلوي اسٽيشن جي اپ گريڊيشن لاءِ 497.574 ملين رپين جي گرانٽ ان ايڊ جي منظوري ڏني. قانوني ۽ انتظامي طريقيڪار جي تڪميل، جنهن ۾ عوامي مشاورت به شامل هئي، کانپوءِ لياري ندي کي باضابطه طور تي ٽي ايم سي لياري جي انتظام هيٺ ڏنو ويو. سنڌ فارمرز زرعي ڪليڪٽو ايڪٽ 2026 جي مسودي جي منظوري ڏيندي، ڪابينا وسيلن جي گڏيل استعمال، جديد زرعي طريقن ۽ مارڪيٽ تائين بهتر رسائي لاءِ هارين جي ڀائيواري کي هٿي ڏيڻ طرف قدم وڌايو. قانون سازي کان اڳ سفارشون آخري شڪل ڏيڻ لاءِ هڪ ذيلي ڪميٽي جوڙي وئي آهي.
