ڪراچي (رپورٽر) وفاقي گهرو وزير محسن نقوي فيڊريشن هائوس ڪراچي ۾ خطاب ڪندي چيو آهي ته گذريل ٽن چئن سالن ۾ 100 ارب ڊالر پاڪستان کان ٻاهر ويا آهن. هن واپاري برادري کي درخواست ڪئي ته جيڪڏهن هو پنهنجي رقم جو رڳو 30 سيڪڙو حصو به واپس آڻين ته بجٽ کان اڳ ملڪ ۾ 10 ارب ڊالر اچي سگهن ٿا. محسن نقوي چيو ته حڪومت واپارين کي ڪاروبار دوست ماحول فراهم ڪرڻ لاءِ پرعزم آهي. جنيوئن بزنس مين لاءِ ڌار پاسپورٽ جاري ڪرڻ جي تجويز آهي ته جيئن انهن کي آمريڪا، يورپ ۽ چين جي ويزا حاصل ڪرڻ ۾ ڏکيائي نه ٿئي. هن انڪشاف ڪيو ته ڪراچي ۾ ڪجهه گروپن پاران غير قانوني طور پئسا ٻاهر موڪلڻ جون ثبوت مليا آهن، جن خلاف سخت ڪارروائي ڪئي ويندي. گهرو وزير وڌيڪ چيو ته مني چينجرز جو ڪردار مشڪوڪ آهي، ڇاڪاڻ ته ڪو به سياح انهن کان پئسا تبديل نٿو ڪرائي، اهي رڳو پئسا ٻاهر موڪلڻ لاءِ استعمال ٿين ٿا. هن چيو ته اسلام آباد ۾ هڪ نئون شهر اڏيو پيو وڃي جيڪو شنگهائي ۽ مين هيٽن جو ميلاپ هوندو، جتي سيڙپڪاري جا وڏا موقعا آهن. ان سان گڏ بلوچستان جي ٻيٽن تي سياحت کي هٿي ڏيڻ لاءِ روڊ شو منعقد ڪيا ويندا ته جيئن ماڻهو مالديپ بدران پاڪستان جو رخ ڪن. وفاقي گهرو وزير محسن نقوي وفاقي ايوانِ تجارت ۾ خطاب ڪندي انڪشاف ڪيو آهي ته گذريل ٽن کان چئن سالن دوران 100 ارب ڊالرن جي رقم پاڪستان مان ٻاهر موڪلي وئي آهي. هن انتيائي سخت لهجي ۾ چيو ته جيڪڏهن ڪو سمجهي ٿو ته پئسن جي منتقلي جو پتو نٿو لڳائي سگهجي ته اها خام خيالي آهي؛ ڪراچي مان رڳو هڪ يا ٻن بااثر ماڻهن کي پڪڙڻ سان سڄي حقيقت سامهون اچي ويندي. محسن نقوي وڌيڪ چيو ته اسان نٿا چئون ته سڄي رقم واپس آڻيو، پر جيڪڏهن واپاري برادري پنهنجي ٻاهر پيل رقم جو رڳو 30 سيڪڙو به واپس آڻي ته بجيٽ کان اڳ ملڪ ۾ 10 ارب ڊالر اچي سگهن ٿا. هن مني چينجرز جي ڪردار تي سوال اٿاريا ۽ چيو ته اهي رڳو پئسا ٻاهر موڪلڻ لاءِ استعمال ٿي رهيا آهن. هن واپارين کي خاطري ڪرائي ته حڪومت کين مڪمل سيڪيورٽي ۽ سهولتون ڏيندي.
