ڪراچي (عوامي آواز رپورٽ) ملڪ جي مالي ماهرن ۽ معاشي حلقن خبردار ڪيو آهي ته پاڪستان ۾ وياج شرح جو سنگل ڊيجٽ ۾ اچڻ جا امڪان في الحال ختم ٿي ويا آهن. ماهرن جو چوڻ آهي ته پاليسي ريٽ جو سڌو سنئون تعلق عالمي جنگي صورتحال، خاص ڪري وچ اوڀر جي ڇڪتاڻ ۽ عالمي مارڪيٽ ۾ تيل جي قيمتن سان آهي، جن ۾ لاڳيتو لاهي چاڙهي سبب وياج شرح گهٽائڻ مشڪل بڻجي ويو آهي. اسٽيٽ بئنڪ آف پاڪستان جي مانيٽري پاليسي ڪميٽي جو ايندڙ اجلاس 27 اپريل تي طلب ڪيو ويو آهي، جنهن ۾ وياج شرح بابت اهم فيصلو ڪيو ويندو. ياد رهي ته اسٽيٽ بئنڪ هن وقت شرح سود 10.5 سيڪڙو تي برقرار رکي آهي، پر مانيٽري ڪميٽي جي 10 ميمبرن مان 2 ميمبرن شرح سود ۾ وڌيڪ واڌ جي تجويز ڏني هئي. مالي ماهرن موجب، ملڪي معيشيت جي موجودہ صورتحال ۽ عالمي دٻاءُ کي ڏسندي، اهي امڪان وڌي رهيا آهن ته ايندڙ اجلاس ۾ شرح سود يا ته برقرار رکي ويندي يا وري ان ۾ معمولي واڌ ڪئي ويندي. ڪجهه ذريعن جو اهو به چوڻ آهي ته هنگامي صورتحال جي ڪري اسٽيٽ بئنڪ مانيٽري پاليسي جو اجلاس 27 اپريل کان اڳ به گهرائي سگهي ٿي.
