واشنگٽن (ويب ڊيسڪ) آمريڪي صدر ڊونلڊ ٽرمپ چيو آهي ته آمريڪا ۽ ايران وچ ۾ گذريل ٻن ڏينهن دوران نهايت هاڪاري ۽ نتيجا ڏيندڙ ڳالهيون ٿيون آهن.
سوشل ميڊيا تي جاري ڪيل بيان ۾ آمريڪي صدر ڊونلڊ ٽرمپ چيو آهي ته” مون کي اهو ٻڌائيندي خوشي ٿي رهي آهي ته آمريڪا ۽ ايران جي وچ ۾ گذريل 2 ڏينهن دوران هاڪاري ۽ نتيجا ڏيندڙ ڳالهيون ٿيون آهن، جنهن جو مقصد وچ اوڀر ۾ جاري ڇڪتاڻ جو مڪمل ۽ حتمي حل ڳولڻ آهي.
ٽرمپ چيو ته انهن گهري، تفصيلي ۽ تعميري ڳالهين کي نظر ۾ رکندي مون جنگ واري کاتي کي هدايت ڏني آهي ته ايران جي بجلي گهرن ۽ توانائي جي بنيادي ڍانچي خلاف ڪنهن به فوجي ڪارروائي کي 5 ڏينهن لاءِ ملتوي ڪيو وڃي.
آمريڪي صدر چيو ته اهو فيصلو جاري ملاقاتن ۽ ڳالهين جي ڪاميابي سان مشروط هوندو.
هن وڌيڪ چيو ته ايراني اختيارين سان ڳالهيون سڄو هفتو جاري رهنديون.
واضح رهي ته ٽرمپ آبناءِ هرمز 48 ڪلاڪن ۾ کولڻ جي ڌمڪي ڏني هئي.
ٽرمپ چيو هو ته جيڪڏهن 48 ڪلاڪن ۾ آبناءِ هرمز نه کلي ته ايراني پاور پلانٽن تي حملا ڪيا ويندا، ايران کي ڏنل 48 ڪلاڪن جي ڊيڊ لائن اڄ ختم ٿي رهي هئي.
ايران جواب ۾ چيو هو ته حملي جو جواب نار وارن ملڪن جي پاور پلانٽن ۽ پاڻي صاف ڪندڙ پلانٽن تي حملن سان ڏنو ويندو.
آمريڪي ميڊيا موجب، ٽرمپ جو اهو اعلان آپريشن ايپڪ فيوري جي خاتمي بابت ڳالهين جي پهرين باظابطا تصديق آهي.
