ڪراچي (رپورٽر) اسلام آباد عدالت ڀرسان آپگهاتي حملي جي واقعي خلاف سنڌ بار ڪائونسل جي سڏ تي ڪراچي بار ايسوسيئيشن طرفان سوڳ جي ڏهاڙي ۽ هڙتال جو اعلان ڪيو ويو. هڙتال جي ڪري سٽي ڪورٽ ۾ ڪارروائيون معطل ٿي ويون، ۽ وڪيلن ڪورٽ جا در بند ڪري ڇڏيا. ٻاهران سائلن جو وڏو انگ گڏ ٿي ويو، جنهن ۾ ڪيترائي ماڻهو پنهنجي ڪيسن جي تاريخ ڄاڻڻ لاءِ پريشان بيٺل رهيا. هڙتال جي ڪري جيلن مان قيدين کي عدالت ۾ پيش نه ڪيو ويو. وڪيلن جو چوڻ هو ته اسان جو احتجاج دهشتگردي خلاف آهي ۽ شهيد ساٿين سان ايڪي جو اظهار آهي. سندھ هاءِ ڪورٽ ۾ 27هين آئيني ترميم خلاف احتجاج ڪيو ويو. انصاف لائر فورم ۽ سنڌ هاءِ ڪورٽ بار ميمبرن 27هين ترميم خلاف نعريبازي ڪئي.
