اسلام آباد (ويب ڊيسڪ) سياري ۾ ڏينهن دوران گرڊ بجلي جي طلب ۾ گهٽتائي ۽ سج جي روشنيءَ سبب واڌو بجلي پيدا ٿيڻ جي خطري کي نظر ۾ رکندي حڪومت نيٽ ميٽرنگ جي قيمت گهٽائڻ تي غور ڪري رهي آهي.
ذريعن موجب، نيٽ ميٽرنگ جي قيمت 22 رپين مان گهٽائي 11.30 رپيا في يونٽ ڪرڻ تي غور هلي رهيو آهي، جڏهن ته وزيراعظم لاڳاپيل اختيارين کي قيمتن تي ٻيهر جائزو وٺڻ جي هدايت جاري ڪري ڇڏي آهي.
نيٽ ميٽرنگ اسڪيم جي نتيجي ۾ سرڪاري نظام تي مالي دٻاءُ وڌڻ لڳو هو، جيڪو گرڊ سان لاڳاپيل واهپيدرن کان في يونٽ 2 رپيا واڌو اوڳاڙي جي صورت ۾ ظاهر ٿيو.
سرڪاري ڊيٽا موجب، ڇتين تي لڳل سولر سسٽم جي تيز رفتار واڌ سبب گرڊ ذريعي وڪرو ٿيندڙ بجلي ۾ 3.2 ارب يونٽن جي گهٽتائي آئي، جنهن سبب ڊسٽريبيوشن ڪمپنين جي منافعي ۾ 101 ارب رپين جي گهٽتائي ٿي ۽ ٽيرف کي 0.9 ڪلوواٽ ڪلاڪ تائين وڌائڻو پيو.
پاور ڊويزن جي ڪاٿي موجب، مالي سال 2034ع ۾ اِهي انگ اکر وڌي 18.8 ارب يونٽ تائين پهچي سگهن ٿا، جنهن جو مالي اثر 545 ارب رپيا ٿيندو ۽ واهپيدارن تي ان جو اثر 5 کان 6 رپيا في يونٽ تائين ٿي سگهي ٿو.
عهديدارن جو چوڻ آهي ته هي معاملو هاڻي هڪ سنجيده مسئلو بڻجي چڪو آهي، جنهن تي وزيراعظم سڌي ريت مداخلت ڪئي آهي.
22 آڪٽوبر تي ٿيل اجلاس ۾ وزيراعظم نيپرا ۽ پاور ڊويزن کي هدايت ڪئي ته هو باءِ بيڪ ٽيرف جو جائزو وٺن ۽ ان جي تصديق ڪن، اِهو نظام سولر واهپيدارن لاءِ بيٽري اسٽوريج طور تي استعمال ٿي رهيو آهي.
